SOCAR Gürcüstana təbii qaz tədarükünün optimallaşdırılması məqsədilə Gürcüstan tərəfinin müraciəti əsasında “Şahdəniz” və Cənubi Qafqaz Boru Kəməri konsorsiumlarının iştirakçıları ilə danışıqlar aparmış və “Şahdəniz” yatağından Gürcüstana qaz ixracı haqqında müvafiq müqavilələrdə müəyyən olunmuş mövsümlə bağlı məhdudiyyətlərin yenidən nəzərdən keçirilməsi barədə razılıq əldə etmişdir.
SOCAR-ın mətbuat xidmətinin yaydığı məlumatda bildirilir ki, razılığa əsasən qış dövründə Gürcüstana qaz tədarükü minimum 50 milyon kubmetr artırılacaqdır. Gürcüstan tərəfinin müraciətinin dəstəklənməsi Azərbaycan və Gürcüstan arasında mehriban qonşuluq müansibətlərinin mövcudluğunu bir daha sübut edir və qarşılıqlı faydalı əməkdaşlığın gələcəkdə də möhkəmləndirilməsi və inkişafı üçün əsas yaradır.
Qeyd edək ki, 2015-ci ildə SOCAR Gürcüstana 1.3 mlrd m3 qaz ixrac etmişdi. Bundan əlavə 721 mln m3 qaz da “Şah-dəniz” konsorsiumu iştirakçıları tərəfindən tranzit həcmləri və kommersiya qazı kimi Gürcüstan bazarına daxil olmuşdu.
