“Nazirlər Kabinetinin 2015-ci ilin yekunlarına həsr olunmuş iclasındakı çıxışında Prezident İlham Əliyev çox önəmli məqamlar haqqında danışdı və hökumətə tapşırıqlarını verdi.
Dövlət başçısı qeyd etdi ki, neftin qiymətinin dünya bazarlarında kəskin şəkildə azalması gəlirlərə mənfi təsir göstərib və qeyri-neft sektorunun inkişafı istiqamətində mühüm addımlar atılmalıdır”. Bu fikirləri SİA-ya açıqlamasında “Caspian Barrel” Neft Araşdırmaları Mərkəzinin rəhbəri İlham Şaban deyib.
O qeyd edib ki, Prezident İlham Əliyevin səsləndirdiyi fikirlər hər kəs üçün önəmli tapşırıqdır: “Cənab Prezident qeyd etdi ki, Neft Fondunun vəsaitini qorumalıyıq. O bildirdi ki, qeyri-neft sektorunun imkanlarından kifayət qədər istifadə olunmalıdır. Vergi Məcəlləsinə edilmiş bir sıra dəyişikliklər artıq qüvvəyə minib və daha da gözəl imkanlar yaradır. Dövlət başçısı hökumətə göstərir ki, son 10 ildə Neft Fondundan həm ayrı-ayrı layihələr üzrə, həm də dövlət büdcəsinə transfertlər üzrə təqribən 85 milyard dollara yaxın vəsait xərclənib. Bu vəsaitlər hesabına bütün ölkə ərazisində irimiqyaslı infrastruktur layihələr həyata keçirilib. Özü də bu təkcə yol-nəqliyyat sahəsində deyil, ölkənin enerji təminatı, elektrik, qaz paylayıcı sistemlərinin qurulması, su-kanal təsərrüfatının yenilənməsi, yeni suvarma sistemlərinin yaradılması, hətta regionlarda belə rabitə sisteminin müasir standartlar səviyyəsinə çatdırılması kimi layihələri də nəzərdə tutur. Bundan əlavə, dövlət vəsaitləri hesabına həm paytaxtda, həm də regionlarda kapitalyönümlü istehsal layihələri həyata keçirilib. Yəni indi büdcə külli miqdarda vəsait qoyulan layihələrdən yararlanmalıdır”.
