Böyük Britaniyanın neft nəhəngi olan BP şirkəti yaxın iki il ərzində bütün dünya üzrə kəşfiyyat və hasilat bölmələrində 4 minə yaxın iş yerini ixtisar edəcək. Bu barədə şirkətin dünən yaydığı məlumatda bildirilir.
Şirkətdən bildiriblər ki, belə bir addımın əsas səbəbi neftin qiymətlərinin aşağı düşməsi, dolların güclənməsi və ehtiyatların həddindən artıq çox olmasıır.
BP-nin məlumatında qeyd olunur ki, ixtisarlar Anqola, Azərbaycan, həmçinin Meksika körfəzi və Şimal dənizi kimi regionlarda fəaliyyət göstərən kəşfiyyat və hasilat sahələrinə toxunacaq.
Ümumilikdə bu bölmələrdəki 24 min yerdən 4 minə yaxını ixtisara düşəcək və bu proses
2017-ci ilin dekabrın sonunadək aparılacaq.
“Biz bir müddət əvvəl demişdik ki, neftin qiymətinin uzun müddət aşağı olacağını gözləyirik, və görünür ki, dediklərimiz öz təsdini tapır. Belə çətin iqtasidi vəziyyətdə biz bu addımları atmağa məcburuq”, – BP nümayəndəsi Financial Times nəşrinə bildirib.
Caspian Barrel xatırladır ki, BP şirkəti ixtisarlarla bağlı ilk açıqlamasını 2014-cü il dekabrın əvvəlində bəyan etmişdi. O zaman şirkət ABŞ, Böyük Britaniya, Almaniya və Azərbaycanda ixtisarlar edəcəyini bildirmişdi. Nəticədə 2015-ci ilin əvvəlindən “BP-Azerbaijan” şirkətində ştatda olan 250 nəfər ixtisar edildi.
