Azərbaycan Prezidenti İlham Əliyev Nərgiz Akif qızı Qurbanovaya ikinci dərəcəli fövqəladə və səlahiyyətli elçi diplomatik rütbəsi verilməsi haqqında sərəncam imzalayıb.
Prezidentin digər sərəncamı ilə Nərgiz Qurbanova Azərbaycan Respublikasının Bolqarıstan Respublikasında fövqəladə və səlahiyyətli səfiri təyin edilib.
Caspian Barrel bildirir ki, Nərgiz Qurbanova bundan əvvəl Azərbaycanın ABŞ-dakı səfirliyində iqtisadi məsələlər üzrə müşavir vəzifəsində çalışıb. Qurbanova son 4 ildə Xəzər regionu və Azərbaycanla bağlı olan bütün iqtisadi konfranslarının aktiv iştirakçılarından olub.
Bu baxımdan onu tez-tez Böyük Britaniyanın “BP” şirkətinin Vaşinqtondakı təmsilçisi Qreq Sonders, ABŞ Dövlət Departamentinin Enerji ehtiyatları üzrə məsul əməkdaşı Daniel Ştayn, enerji, təbii sərvətlər və geosiyasət İnstitunun direktoru Ariel Koenin iştirakı ilə keçirilən tədbirlərdə qızğın müzakirələrə qoşulmasını seyr etmək olardı.
Məsələn, 2012-ci ilin oktyabrında Amerika Universitetinin Qara dəniz və Xəzər dənizi hövzəsi üzrə Araşdırmalar Mərkəzində “Azərbaycan: təbii qazın Avropaya nəqlində artan tələbatın ödənilməsinə strateji təsiri” mövzusunda tədbirdə Qurbanova enerji layihələrinə ABŞ tərəfindən siyasi dəstəyin verilməsinin vacibliyini vurğulamış və bu xüsusda “Cənub dəhlizi” layihəsinə ABŞ hökumətinin dəstək verməsinin təqdirəlayiq olduğunu bildirmişdi.
2013-cü ilin aprelində Vaşinqtonda ABŞ-ın Con Hopkins Universitetinin Mərkəzi Asiya-Qafqaz İnstitutu tərəfindən “İstanbul Prosesi – 26 aprel, Astana görüşü: 2014-cü ildən sonrakı Əfqanıstanda aydınlığa doğru” mövzusunda keçirilən tədbirdə isə Qurbanova NATO qüvvələrinin Əfqanıstandan çıxarılması zamanı Azərbaycanın tranzit ölkə kimi imkanlarını tədbir iştirakçılarının diqqətinə çatdırmışdır.
Bundan əlavə Qurbanova SOCAR-ın Amerikadakı tədbirlərinin də yaxından iştirakçısı olub.
İndi isə xanım Qurbanova Bolqarıstana təyinat alıb. Bolqarıstan Azərbaycan üçün vacib ölkədir. Siyasi baxımdan iki ölkə arasında heç zaman problem yaşanmayb, iqtisadi baxımdan isə əlaqələr enerji layihələri üzırində vüsət alır. Əvvəla, bu ölkənin “Bulgargaz” şirkəti 2013-cü ilin sentyabrında “Şahdəniz” konsorimu ilə qaz alqı-satqısına dair 25 illik müqavilə imzalayıb. Müqavilə 2020-ci ildən həyata keçirilməyə başlayacaq və Yunanıstan ərazısındən Bolqarıstana çəkiləcək birləşdirici kəmər vasitəsilə reallaşacaq. Azərbaycan “Şahdəniz-2” müqaviləsi layihəsi çərçivəsində bu ölkəyə hər il 1 milyard kub metr qaz ixrac edəcək.
Ancaq Bolqarıstan rəhbərliyi təkcə bununla kifayətlənmək fikrində deyil və rəsmi Bakı ilə ötən il aparılan görüşlərdə bir-neçə dəfə vurğulanıb ki, Azərbaycan qazının əlavə həcmlərinin Avropaya nəql edilməsində Bolqarıstan tranzit ölkəyə çevrilmək üçün hər cür şərait yaratmağa hazırdır.
Ona görə də Azərbaycan Prezidenti İlham Əliyevin Bolqarıstana səfir qismində Nərqiz Qurbanova kimi enerji məsələləri üzrə ixtisaslaşmış bir diplomatın ezam etməsi heç də təəəccüblü deyil. Böyük ehtimalla Qurbanova qarşısında yaxın dövr üçün Bolqarıstan və Şərqi Avropa ölkələrinə qaz ixracı və tranziti məsələləri bir vəzifə tapşırığı kimi qoyulub.
