2001-ci ildən 2016-ci ilin 1 yanvarına qədər olan müddətdə Azərbaycan Respublikası Dövlət Neft Fonduna (ARDNF) “Azəri-Çıraq-Günəşli” neft yataqları blokunun işlənməsi çərçivəsində 117 milyard dollar vəsait daxil olub.
“2015-ci ildə AÇG çərçivəsində 6.9 milyard dollar daxil olub”,- deyə Fonddan bildiriblər.
Caspian Barrel-in məlumatına görə, 2014-cü ilin nəticələrinə görə,Neft Fonduna AÇG-dən daxilolmalar 15 milyard 118 milyon dollar təşkil etmişdi. Beləliklə, keçən ildə Fondun gəlirləri AÇG çərçivəsində 54.4% azalıb.
AÇG blokunun işlənməsi müqaviləsi 1994-cü ildə imzalanıb. Blokunun sübut olunmuş neft ehtiyatları bir milyard ton təşkil edir.
Müqavildə iştirak payı aşağıdakı kimi bölüşdürülüb : BP (operator) – 35.78 faiz, “Şevron” – 11,27 faiz, “Inpex” – 10,96 faiz, AzACG – 11,65 faiz, “Statoyl” – 8,56 faiz, “Exxon” – səkkiz faiz, TPAO – 6,75 faiz, “Itocu” – 4,3 faiz, ONGC – 2,72 faiz.
Dövlət Neft Fondu 1999-cu ildə yaradılıb, praktiki fəaliyyətə isə 2001-ci ilin iyununda başlayıb. O zaman onun aktivləri 271 milyon dollar təşkil edib.
1 oktyabr 2015-ci il tarixinə ARDNF-nin aktivləri ilin əvvəli ilə müqayisədə 6.38% azalaraq 34,74 milyard dollar təşkil edib.
