Ona görə ki, test imtahanlarından cəmi 1111 nəfər keçsə də, sonrakı peşə hazırlığı mərhələsinə isə yalnız 942 nəfər qatıla bilib
Ölkədə qazlaşdırma proseslərinin sürətləndirilməsi nəticəsində “Azəriqaz” İstehsalat Birliyinin bölgələrdəki strukturlarında əlavə işçi qüvvəsinə tələbat yaranması ilə əlaqədar olaraq SOCAR və Azərbaycan Respublikasının Əmək və Əhalinin Sosial Müdafiəsi Nazirliyi arasında imzalanmış Əməkdaşlıq Memorandumu çərçivəsində Birliyin 8 region üzrə 46 rayonu əhatə edən qaz istismar idarələri üçün “Qaz avadanlıqlarının istismarı və təmiri üzrə çilingər” peşəsi üzrə işə qəbul müsabiqəsi yekunlaşmışdır.Müsabiqənin yekun mərhələsində “Qaz avadanlıqlarının istismarı və təmiri üzrə çilingər”lərin hazırlanma kurslarını müvəffəqiyyətlə başa vurmuş 942 nəfərdən Azərbaycan Respublikasının 7 regionunda təşkil olunmuş müsahibələrə dəvət olunmuş, onlardan 365-i müsabiqənin bu turundan da müvəffəqiyyətlə keçmişdir. Müsabiqədə müvəffəqiyyət qazanan müdavimlərin müvafiq prosedurlardan sonra ən qısa zamanda işə qəbul edilməsi nəzərdə tutulmuşdur. Müsahibə nəticəsində nisbətən yüksək nəticə göstərən digər 220 nəfər isə SOCAR-ın Kadr Ehtiyatı Bazasına daxil edilmiş və onların “Azəriqaz” İB-də növbəti bir il ərzində yaranacaq kadr tələbatına uyğun olaraq işlə təmin edilməsi nəzərdə tutulur.
Namizədlər müsabiqənin nəticələri barədə məlumatları SOCAR-ın İnsan Resursları Departamenti tərəfindən göndərilmiş xüsusi bildirişlər və ya vakansiyaya müraciət edən zaman onlara təqdim olunmuş FİN (fərdi identifikasiya nömrəsi) və şifrəni daxil etməklə www.socar.az internet səhifəsinin “Karyera” bölməsinin “İşə qəbul” bölümünün “Müsabiqə nəticələri” paneli vasitəsilə ala biləcəklər. Müsabiqə prosesi şəffaf, obyektiv və ədalətli keçirilmişdir.
Xatırladaq ki, “Qaz avadanlıqlarının istismarı və təmiri üzrə çilingər” peşəsi üzrə işə qəbul müsabiqəsində 4628 nəfərin müraciəti qeydə alınmış, onlardan 3266 nəfəri test imtahanına dəvət olunmuş, 2581 nəfəri test imtahanında iştirak etmişlər. Test imtahanından keçən 1111 nəfərdən 942 nəfəri SOCAR-ın Təlim, Tədris və Sertifikatlaşdırma İdarəsi tərəfindən təşkil olunmuş təlimlərdə iştirak etmişlər.
