SOCAR (Azərbaycan Dövlət Neft Şirkəti) 2017-ci ilin sonu-2018-ci ilin əvvəlində Sumqayıtda karbamid zavodunu istifadəyə verməyi planlaşdırır. Bu barədə cümə günü jurnalistlərə şirkətin prezidenti Rövnəq Abdullayev bildirib.
Tikinti işlərini 2016-cı ildə başa çatdırmaq planlaşdırılsa da, sonra bu müddət 2017-ci ilə keçirilib.
“Zavodun tikintisi plan üzrə gedir. Düşünürük ki, müəssisə 2017-ci ilin sonu-2018-ci ilin əvvəlində istifadəyə veriləcək”, – deyə R.Abdullayev “İnterfaks-Azərbaycan” agentliyinin müxbirinin sualına cavabında deyib.
O əlavə edib ki, bu layihənin icrası üçün Koreyanın ixrac-idxal bankı qısamüddətli kredit ayırıb.
“Hazırda bankla əsas uzunmüddətli kreditin cəlb olunmasına dair danışıqlar aparılır. Müvafiq müqavilə hazırlanır. İlin sonuna kimi danışıqlar başa çatacaq”, – deyə o qeyd edib.
Daha əvvəl şirkətin iqtisadi məsələlər üzrə vitse-prezidenti Süleyman Qasımova istinadən məlumat verilmişdi ki, Sumqayıtda karbamid zavodunun tikintisi layihəsinin maliyyələşdirilməsi üçün “Samsung Engineering” şirkəti Koreyanın ixrac-idxal banklarından 6 ay müddətinə 150 mln. avro həcmində kredit cəlb edib.
Cari ilin sonuna kimi SOCAR bu müqaviləni uzunmüddətli kredit sazişi ilə əvəz edəcək. Zəmanətçi qismində Maliyyə Nazirliyi çıxış edəcək.
Layihənin ƏDV nəzərə alınmadan dəyəri 500 mln. avro təşkil edir.
İnterfax.az
