Fransanın “Axens” şirkəti Heydər Əliyev adına Neft Emalı Zavodunda dizelin və benzinin hidrotəmizlənməsi qurğuları üzrə lisenziar seçilib. Bu barədə SOCAR-ın (Azərbaycan Dövlət Neft Şirkəti, SOCAR) saytında məlumat verilir. Oktyabrın 28-də
Bakıda SOCAR-la “Axens” arasında lisenziyaya dair müqavilə imzalanıb.
İmzalanma mərasimində SOCAR-ın prezidenti Rövnəq Abdullayev qeyd edib ki, Heydər Əliyev adına Neft Emalı Zavodunun yenidən qurulmasıvə modernləşməsiçərçivəsində bir neçə yeni qurğunun – bitum istehsalı, dizel hidrotəmizləmə, hidrogen istehsalı qurğusu, aminlə təmizləmə, “LPG Merox”, isomerizasiya, nafta və katalitik krekinqdən alınan benzin fraksiyasının hidrotəmizlənməsi, kükürd istehsalı və s. qurğuların inşası planlaşdırılır.
R.Abdullayevin sözlərinə görə, bununla əlaqədar qurğular üzrə lisenziyaların alınması və eləcə də layihələndirmə xidmətlərinin yerinə yetirilməsi istiqamətində işlərə başlanılıb və cari ilin noyabr ayının sonuna kimi müqavilələrin imzalanması nəzərdə tutulur.
Şirkət rəhbəri onu da bildirib ki, SOCAR uzun müddətdir “Axens” şirkəti ilə əməkdaşlıq edir. Xüsusilə SOCAR-a məxsus olan və Türkiyədə tikilən “Star” neft emalı zavodunun nafta hidrotəmizləmə, dizel hidrotəmizləmə və kerosin hidrotəmizləmə qurğuları Fransa şirkətinin lisenziyası əsasında inşa edilir.
Daha əvvəl R.Abdullayevə istinadən məlumat verilib ki, 2015-ci ilin sonunda SOCAR BNEZ-in yenidən qurulmasıvə modernləşməsiüzrə işlərə başlamağı və 2018-ci ilin sonunda bitirməyi planlaşdırır. Bu, zavodda “Euro-5” standartına cavab verən daha yüksək keyfiyyətli benzin və dizel yanacağının istehsalını həyata keçirməyə və 2030-cu ilin ortalarına qədər ölkənin bu yanacaq növlərinə olan tələbatını ödəməyə imkan verəcək.
Xəbər verildiyi kimi, BNEZ-in yenidən qurulması və modernləşməsi layihəsinə neftin ilkin emalı üzrə qurğunun gücünün illik 6 mln. tondan 7,6 mln. tona qədər, katalitik krekinq qurğusunun gücünün illik 2 mln. tondan 2,5 mln. tona qədər artırılması daxildir.
Heydər Əliyev adına BNEZ-də yenidənqurma və modernləşmə nəticəsində avtomobil benzininin illik istehsal həcmi 1,3 mln. tondan 2,2 mln. tona qədər, dizel yanacağının istehsal həcmi 2.3 mln. tondan 2,9 mln. tona qədər, təyyarə yanacağının istehsal həcmi 700 min tondan 1 mln. tona qədər artacaq.
