Dövlət Neft Şirkətinin (SOCAR) prezidenti Rövnəq Abdullayev bu günlərdə Malta Respublikasına səfər edib.
Caspian Barrel SOCAR mətbuat xidmətinə istinadən bildirir ki, səfər çərçivəsində Abdullayev Maltanın baş naziri Cozef Muskat ilə görüşmüşdür.
Maltanın enerji naziri Konrad Mizzinin də iştirak etdiyi görüşdə SOCAR-ın bu ölkədə həyata keçirdiyi investisiya layihəsi müzakirə edilmiş, layihənin qrafikə uyğun şəkildə uğurla icra edildiyi qeyd olunmusdur. Tərəflər Azərbaycan və Malta arasında enerji sahəsində əməkdaşlığın inkişaf etdirilməsi üçün mövcud olan imkanlardan danışmış, investisiya layihələrinin genişləndirilməsi perspektivlərini nəzərdən keçirmişlər. R
Malta hökumətinin başçısı Cozef Muskat ötən il Bakıya səfərini xatırladaraq, neft və qaz sektorunda strateji əməkdaşlıq haqqında imzalanmış Anlaşma Memorandumunun əlaqələrin daha da genişləndirilməsi üçün yaxşı imkan yaratdığını qeyd etmişdir. Görüşdə tərəfləri maraqlandıran digər məsələlər də müzakirə olunmuşdur.
Caspian Barrel xatırladır ki, SOCAR-ın 100%-lik törəmə şirkəti olan SOCAR Trading 2013-cü ilin oktyabrında təsis edilmiş “ElectroGas Malta” konsorsiumunun təsisçilərinindən biridir və Maltada qazla işləyəcək elektrik stansiyası layihəsində 20%-lik paya malikdir. Buraya qaz tankerlərlə maye halına salındıqdan sonra daşınacaq.
* Layihənin digər iştirakçıları Qərbin tanınmış enerji şirkətləridir: Gasol (30%), GEM Holdings Ltd (30%) və Siemens Projects Ventures (20%). Layihənin ümumi dəyəri 175 milyon avrodur və onun 2016-cı ilin ortalarında başa çatdırılması planlaşdırırlır. Qeyd edək ki, Malta 1 may 2004-cü il tarixindən Avropa İttifaqının üzvüdür.
