Dünən “Gulf Drilling Azerbaijan” şirkəti (“Gulf Drilling Supply FZE” şirkətinin törəmə müəssisəsi, BƏƏ) yeni qazma qurğusunun təqdimatını keçirib. Bu barədə “İnterfaks-Azərbaycan” agentliyinin müxbiri təqdimatdan məlumat verib.
Şirkətin sifarişi ilə Çində hazırlanan “ZJ-20” modelqurğusu ən son texnoloji yeniliklərdən istifadə olunaraq hazırlanıb və tam həcmdə xarici sərmayə hesabına maliyyələşdirilib. Qurğunun quruda yerləşən neft və qaz yataqlarında 2000-2400 m dərinliyədək qazma, köhnə quyularda isə 4500 m dərinliyə qədər əsaslı təmir işləri aparma imkanı var.
Yeni qurğunun nominal qaldırma imkanı isə 120 ton təşkil edir. “ZJ-20” model qazma qurğusunun mühərrikinin gücü 450 kVt, yaxud da 610 at gücü, qüllənin hündürlüyü isə 35 metrdir.
Avqust ayının əvvəlində Azərbaycana gətirilən qurğu “Ramanı” yatağı ərazisində quyu qazılacaq ərazidə quraşdırılıb. Artıq şirkət qurğu üçün iş həcmini də müəyyənləşdirib. Qurğu ilkin olaraq “AzGerneft”MMC-nin sifarişi ilə qazma aparacaq. Bu müəssisə üçün bu il 2, 2016-cı ildə 4 quyu qazılacaq.
“Qurğu gələcəkdə təkcə “Ramanı”da deyil, digər ərazilərdəki yataqlarda da istifadə oluna bilər. Başqa şirkətlərdə də həmin dərinliyə uyğun yeni qurğu üçün iş olacağını düşünürük. Əminik ki, qurğu qısa müddətdə sərf olunmuş sərmayəni geri qaytara biləcək. Qurğunun hazırlanmsına 5 mln. manat sərmayə qoyulub”, – deyə təqdimat mərasimində “Gulf Drilling Azerbaijan” şirkətinin direktoru İlham Babayev bildirib.
Qurğunun əsas üstünlüklərindən biri də odur ki, yığcam və mobildir, bir quyuda işlər bitdikdən sonra digər quyuya daşınmaq üçün asanlıqla demontaj olunur.
“Gulf Drilling Azerbaijan” şirkəti 2007-ci ilin sonunda fəaliyyətə başlayıb. Şirkətin əsas məqsədi neft, qaz və su quyularının qazılması, quyuların əsaslı təmiri, quyuların qazılmasında xidmətin göstərilməsidir.
