Azərbaycan neft ixracı üzrə əməliyyatlara başladığı dövrdən (1997-ci ilin dekabrından) dünya bazarlarına 390 mln. tondan artıq neft ixrac edib. Bu barədə SOCAR-ın (Azərbaycan Dövlət Neft Şirkəti) geologiya, geofizika və yataqların işlənməsi üzrə birinci vitse-prezidenti Xoşbəxt Yusifzadə rəsmi mətbuatda dərc edilmiş məqaləsində qeyd edib.
“Qeyd olunan həcmdən Bakı-Tbilisi-Ceyhan neft boru kəməri ilə dünya bazarlarına 283 mln. ton, Bakı-Supsa neft boru kəməri ilə 74 mln. ton, Bakı-Novorossiysk neft boru kəməri ilə 12 mln. ton Azərbaycan nefti ixrac edilib”, – deyə X.Yusifzadə bildirib.
Daha 21 mln. ton Azərbaycan nefti Bakı-Gürcüstan dəmir yolu ilə dünya bazarlarına ixrac olunub.
O xatırladıb ki, 2014-cü ildə Azərbaycanda 42 mln. ton neft və 29,6 mlrd. kubmetr qaz hasil edilib. 33,7 mln. ton neft “BP-Azerbaijan” şirkətinin payına düşüb. Hesabat dövrü ərzində SOCAR tərəfindən hasilatın həcmi 8,3 mln. ton neft və 7,2 mlrd. kubmetr qaz təşkil edib.
“2015-ci ilin 8 ayı ərzində Azərbaycanda 27,8 mln. ton neft hasil olunub. 22,3 mln. ton neft BP-nin, 5,5 mln. ton neft isə SOCAR-ın payına düşüb”, – deyə X.Yusifzadə qeyd edib.
Xatırladaq ki, hazırda Azərbaycan təqribən hər ay 2,8 milyon ton neft və kondensat ixrac edir.
