Ölkənin təbii qaza olan tələbatının davamlı təminatı və ixrac imkanlarının genişləndirilməsində mühüm rol oynayan “Azneft” İstehsalat Birliyinin Qaz Anbarlarının İstismarı İdarəsi bu ilin ilk 6 ayını uğurlu göstəricilərlə başa vurub.
Caspian Barrel SOCAR-a istinadən xəbər verir ki, aprel ayından payız-qış mövsümü üçün İdarənin balansındakı “Qaradağ” və “Qalmaz” qaz anbabarlarına təbii qazın vurulmasına başlanılıb. İndiyədək yeraltı qaz anbarlarına ümumilikdə 892 milyon kubmetrdən artıq qaz vurulub. Qalıq qazla birlikdə hazırda anbarlarda yığılmış aktiv qazın miqdarı 1 milyard 822 milyon kubmetr təşkil edir.
Nəql olunan qazın tələblərə uyğun hazırlanması məqsədilə bir sıra zəruri tədbirlər görülür. “Qaradağ” Qazsaxlama Sahəsinin qazpaylama məntəqəsinin qazvurma-qazgötürmə imkanlarını artırılması üçün əlavə 5 quyuluq manifold sistemin tikintisi başa çatdırılıb. Burada 5 quyuluq manifold qovşağı tikilmiş, quyulara şleyf xətləri çəkilmiş, yeni şam xətti və şam separatoru, 1 ədəd tədqiqat separatoru, mövcud separatorlara qoruyucu klapanlar quraşdırılmış və mövcud sistemlə əlaqələndirilib. Hazırda manifold qovşağının işinə nəzarəti avtomatik şəkildə həyata keçirmək üçün işlər görülür.
Bundan başqa, Sahədəki qazpaylama məntəqəsinin genişləndirilməsi işləri davam etdirilir.
“Qalmaz” Yeraltı Qaz Anbarlarında qazmadan alınmış və eyni xətdə işləyən quyuların qoşulması üçün qazpaylama məntəqəsinin genişləndirilməsi işlərinə başlanılmışdır. “Qalmaz” Qaz Kompressor Sahəsində məhsuldarlığı 10 milyon kubmetr olan 2 ədəd toztutucu quraşdırılmış və istismara verilmişdir.
Anbarlardan çıxarılan qazın beynəlxalq tələblərə uyğun hazırlanmasını təmin etmək məqsədilə “Qaradağ” və “Qalmaz” yeraltı qaz anbarlarında qazın kompleks hazırlanması qurğusunun quraşdırılması nəzərdə tutulur. Bu məqsədlə “Compra Energy” şirkəti tərəfindən qurğunun layihələndirilməsi işləri başa çatdırılmış, avadanlıqların alınmasına başlanılmışdır.
Qaz anbarlarının imkanlarının genişləndirilməsi məqsədi ilə carı ilin 6 ayı ərzində 23 quyuda əsaslı təmir, 2 quyuda cari təmir işləri, 79 quyuda 476 müxtəlif geoloji-tədqiqat işləri aparılmışdır. İlin əvvəlindən “Qaradağ” yeraltı qaz anbarında 2 quyu qazılaraq istismara verilmişdir.
