Azərbaycan prezidenti İlham Əliyev bu gün Nazirlər Kabinetinin iclasında yekun nitqi zamanı Cənub Qaz Dəhlizinin reallaşması yönündə işlərin vəziyyəti haqda da danışıb.
Virtualaz.org saytı xəbər verir ki, dövlət başçısı Azərbaycanın Avropa üçün yeganə alternativ qaz təchizatı mənbəyi olduğunu, fevral ayında Bakıda Cənub Qaz Dəhlizinə daxil olan ölkələrin nazirlər toplantısının keçirildiyini və bu toplantıda Azərbaycanın Avropanın enerji təchizatında lider rolunun vurğulandığını xatırladıb.
Prezident deyib ki, ötən ay Qarsda TANAP qaz kəmərinin təməli qoyulub və bu layihənin həyata keçirilməsi yönündə işlər uğurla davam edir. Lakin Azərbaycan prezidenti Transadriatik Qaz Kəməri (TAP) layihəsinin qarşısında “bəzi süni əngəllər yaradıldığını”, bu əngəllərin aradan qaldırılmasının Avropa İttifaqının vəzifəsi olduğunu da deyib. İlham Əliyev bildirib ki, Azərbaycan Avropanın enerji təchizatına dair üzərinə götürdüyü bütün öhdəliklərə, verdikləri bütün vədlərə əməl edir, boş-boş bəyanatlar səsləndirmir və konkret hansı vəzifəni qarşıya qoyubsa onu həyata keçirir.
Azərbaycan prezidenti TAP layihəsinin qarşısında yaradılan əngəllər barədə ətraflı danışmasa da söhbətin bu layihə ətrafında Yunanıstan və İtaliyada gedən proseslərdən getdiyini təxmin etmək olar. Virtualaz.org bu mövzunu diqqətdə saxlayır və bir neçə dəfə öz təhlillərini oxuculara çatdırıb.
Xatırladırıq ki, Yunanıstanda radikal solçuların daxil olduğu koalisiya parlament seçkilərində qalib gəlib hökuməti formalaşdırandan sonra Afina əvvəlki hökumətin TAP layihəsinə dair imzaladığı müqaviləyə yenidən baxılacağı haqda bəyanatlar verib. Yunanıstan hökuməti bildirir ki, bu layihəni dəstkləməyə hazırdır, ancaq bir şərtlə: TAP-a dair tranzit müqaviləsinə yenidən baxılsın və Yunanıstanın daha çox tranzit gəlirləri əldə edilməsi təmin olunsun.
Habelə, Rusiya və Türkiyənin Yunanıstan sərhədinə qədər çəkməyə hazırlaşdıqları “Türk axını” qaz kəməri layihəsi də Azərbaycan qazının Avropaya nəql edəcək dəhliz ətrafında siyasi intriqaları artırıb. Digər tərəfdən İtaliyanın cənubunda Azərbaycan qazını Avropaya nəql edəcək kəmərin ətraf mühitə zərər vuracağı iddiaları ətrafında kampaniyalar ara vermir. Hətta bu yaxınlarda TAP konsorsiumunun podratçı şirkətlərindən birinin texnikası sıradan çıxarılmışdı və İtaliya mediası kəmərə qarşı yeni sabotajların ola biləcəyini yazırdı.
Şübhəsiz ki, İtaliya və Yunanıstan Avropa İttifaqının üzvü olduğu üçün bu əngəllər ilk növbədə Brüsseli narahat etməlidir. Rəsmi Brüssel hər cür bürokratiyanı bir kənara qoyub Cənub Qaz Dəhlizinin reallaşmasını ləngidə biləcək əngəlləri sürətlə aradan qaldırmalıdır. Əks halda uduzan Azərbaycan olmayacaq…
