Bakıda belə bir toplantının keçirilməsi və Cənub Qaz Dəhlizi keçən ölkələrin enerji nazirlərinin bu layihəni bir daha dəstəkləməsi tikinti fazasına qədəm qoyduğu dövrdə layihəyə olan inamın artırılması deməkdir.
Bu barədə Gün.Az-a Neft Araşdırmaları Mərkəzinin rəhbəri İlham Şaban dünən Bakıda keçirilən Cənub Qaz Dəhlizi layihəsinin həyata keçirilməsi üçün cəlb edilmiş ölkələrin enerji nazirlərindən ibarət Məşvərət Şurasının ilk iclasını şərh edərkən bildirib:
“Dünənki iclas 6 saat davam edən hərtərəfli müzakirələrdən sonra birgə bəyannamə imzalanması ilə başa çatdı. Tərəflər qeyd etdilər ki, öz öhdəliklərinə düşən vəzifələri yerinə yetirməyə söz verirlər və layihənin icrasında qərarlıdırlar. Bunu ən böyük nailiyyətlərdən hesab etmək olar”.
Ekspert həmçinin qeyd edib ki, Azərbaycanın təşəbbüsü ilə çağırılan bu toplantı ötən ilin sonlarından regionda yaranmış iqtisadi-siyasi gərgin vəziyyətin və onun Cənub Qaz Dəhlizinə təsirlərinin yumşaldılması yönündə atılan ən böyük addım idi.
“Əsasən ötən ilin sonunda qərblə Rusiya arasında Ukrayna probleminin gərginləşməsi və bu baxımdan enerji probleminin qabardılması və nəticə olaraq “Cənub axını” layihəsindən Rusiyanın imtina etməsindən sonra qəflətən “Türk axını” layihəsinin gündəmə gəlməsi ilə əlaqədar qaz marşrutları ilə bağlı dumanlı fikirlər səslənirdi.
Belə fikirlər hökumətlərə, şirkətlərə müəyyən təsirlər edirdi. Amma Bakıda belə bir toplantının keçirilməsi və Cənub Qaz Dəhlizi keçən ölkələrin enerji nazirlərinin bu layihəyə bir daha öz dəstəklərini verməsi artıq tikinti fazasına qədəm qoyduğu dövrdə layihəyə olan inamın artırılması deməkdir. Bu, iclasın ən böyük uğurudur”-deyə, İ.Şaban əlavə edib.
Ekspert layihənin əhəmiyyətini bir daha vurğulayaraq qeyd edib ki, ona uzunmüddətli investisiya proqramı kimi baxmaq lazımdır:
“Düzdür, hazırda enerji bazarında qiymətlər aşağıdır, amma pessimistliyə qapılmaq olmaz. Çünki Cənub Qaz Dəhlizi layihəsi bir illik, beş illik layihə deyil. Dünya bazarında enerjinin qiyməti bir neçə il aşağı olsa belə nəzərə almalıyıq ki, Azərbaycanın qaz ixrac potensialı və Cənub Qaz Dəhlizi layihəsi 40 il və ondan daha çox müddətə hesablanmış layihədir”.
Günel Abbasova
Gün.Az
