Fevralın 16-da “Ramada-Baku” otelində Azərbaycan Respublikası Dövlət Neft Şirkəti ilə Azərbaycan Mətbuat Şurasının birgə layihəsi olan “Gənc jurnalistlər üçün SOCAR Qış məktəbi”nin rəsmi açılışı keçirilmişdir.
Caspian Barrel Şirkətin mətbuat xidmətinə istinadən xəbər verir ki, mərasimdə çıxış edən SOCAR-ın birinci vitse-prezidenti, akademik Xoşbəxt Yusifzadə “Qış məktəbi” iştirakçılarını salamlamış, onlara Azərbaycan neft sənayesinin tarixi, gələcək perspektivləri haqqında ətraflı məlumat vermiş, gənc jurnalistlər üçün nəzərdə tutulan layihənin məqsədlərindən danışmışdır.
Bildirilmişdir ki, böyük ənənələri olan Azərbaycan neftçiləri dünya neft sənayesinin inkişafına mühüm töhfələr vermişlər. Akademik X.Yusifzadə jurnalistlər üçün təşkil edilən Qış məktəbinin ölkəmizdə ilk belə layihə olduğunu söyləmiş və bu layihənin gələcəkdə də davam edəcəyinə əminliyini bildirmişdir.
Azərbaycan Mətbuat Şurasının sədri Əflatun Amaşov reallaşdırılan layihənin gənc jurnalistlərin ixtisaslaşması baxımından böyük əhəmiyyət kəsb etdiyini vurğulamış, gənc jurnalistləri bu tədbirdən bəhrələnməyə çağırmışdır. Azərbaycan Mətbuat Şurası İdarə Heyətinin üzvü, “525-ci qəzet”in baş redaktoru Rəşad Məcid SOCAR-a jurnalistlər üçün yaratdığı şəraitə görə minnətdarlığını bildirmiş, təklif etmişdir ki, bu tip layihələr gələcəkdə yaş məhdudiyyəti nəzərə alınmadan keçirilsin.
Xatırladaq ki, tədbirdə Mətbuat Şurası sədrinin müavini Umud Rəhimoğlu, Azərbaycan Mətbuat Şurası İdarə Heyətinin üzvü, “İki sahil” qəzetinin baş redaktoru Vüqar Rəhimzadə iştirak etmişlər. Sonda “Qış məktəbi” iştirakçılarının sualları ətraflı cavablandırılmışdır. 
Qeyd edək ki, “Gənc jurnalistlər üçün SOCAR Qış məktəbi” iştirakçıları üçün maraqlı proqram hazırlanmışdır. Layihə çərçivəsində enerji sektorunun bütün sahələrini – neft yataqlarının geologiya-geofizikası, qazma texnologiyası, neft-qaz hasilatı, həmçinin jurnalist etikası, medianın problemləri və s. mövzularda çıxışlar olacaq, təqdimat və diskussiyalar keçiriləcək, iştirakçılar Şirkətin məsul şəxsləri, Mətbuat Şurasının nümayəndələri, ekspertlər ilə görüşəcəklər.
Qış məktəbi dövründə Şirkətin idarə və müəssislərinə ekskursiyalar təşkil ediləcək ki, bu da onların istehsalat prosesi ilə yaxından tanış olmalarına imkan yaradacaqdır.
