Dövlət Statistika Komitəsi məlumat verir ki,2014-cü ilin nəticələrinə görə, Cənubi Qafqaz qaz kəməri ilə 2013-cü ildəki 4.7 milyard kub metrə qarşı 6.5 milyard kub metr qaz ixrac edilib.
Dövlət Statistika Komitəsinin məlumatına görə, 2014-ci ildə, bütövlükdə Azərbaycanın əsas qaz kəmərləri ilə 21.9 milyard kub metr qaz nəql edilib ki, bu da 2013-cü ilin göstəricisindən 9.4% çoxdur.
Qeyd edək ki, Cənubi Qafqaz qaz kəməri ilə qaz nəqlinə 2007-ci ildən başlanılıb. O ildən bəri ilk dəfə rekord həcmdə qaz nəqli qeydə alınıb. Yanlız bir dəfə 2009-cu ildə Cənubi Qafqaz qaz kəməri ilə 5 milyard kub metr qaz nəql edilmişdi.
Cənubi Qafqaz qaz kəməri ilə “Şahdəniz” qaz yatağından “Mərhələ-1” layihəsi çərçivəsində hasil edilən qaz ixrac edilir. Qaz əsasən Türkiyəyə tədarük edilir. 2013-cü ildən Gürcüstan kiçik həcmlərdə qaz alır.
*Cənubi Qafqaz qaz kəməri 2004-2006-cı illərdə inşa edilib. Kəmərin operatoru BP şirkətidir. Kəmərin uzunluğu 680 km,buraxılış gücü isə 7.4 milyard kub metrdir. Kəmərin tikintisi “Şahdəniz” konsorsimu iştirakçılarına 1.1 milyard dollara başa gəlmişdi.
