“Cənub Qaz Dəhlizi” QSC nizamnamə kapitalını $300 mln.-a qədər artıracaq. Bu barədə “İnterfaks-Azərbaycan” agentliyinə Qiymətli Kağızlar üzrə Dövlət Komitəsindən məlumat verilib.
Nizamnamə kapitalının artırılması səhm nominalının konvertasiyası yolu ilə həyata keçiriləcək. Səhmlərin nominalı $1 mln.-dan $3 mln.-a qədər artacaq. Nizamnamə kapitalı 100 ədəd səhmə bölünüb.
Hazırda “Cənub Qaz Dəhlizi” QSC-nin nizamnamə kapitalı $100 mln.-a bərabərdir.
Xəbər verildiyi kimi, Azərbaycan prezidenti İlham Əliyev 2014-cü il fevralın 25-də “Şahdəniz” qaz-kondensat yatağının ikinci mərhələsinin işlənməsi layihəsinin səmərəli idarə olunması, Cənubi Qafqaz, Trans-Anadolu (TANAP) və Trans-Adriatik (TAP) qaz kəmərlərinin genişləndirilməsi ilə bağlı qapalı səhmdar cəmiyyətinin yaradılması haqqında sərəncam imzalayıb. Cəmiyyətin kapitalında SOCAR 49%, dövlət 51% pay sahibidir.
