SOCAR “Azərneftyağ” neft emalı zavodunun Heydər Əliyev adına Baki Neft Emali Zavoduna (BNEZ) birləşdirilməsinə start verdi. Bu məqsədlə fevralın 3-də H.Əliyev adına BNEZ-da “Azərneftyağ” neft emalı zavodunun fəaliyyətinə 01.01.2015-ci il tarixindən xitam verilməsi və Heydər Əliyev adına BNEZ-na birləşdirilməsi nəticəsində aparılacaq struktur dəyişiklikləri ilə əlaqədar zavod kollektivi ilə görüş keçirilib.
Caspian Barrel-in SOCAR-a istinadən verdiyi məlumata görə, BNEZ-nun yeni ştatlarının əmək funksiyalarının icrası üçün tələb olunan daha yüksək peşəkarlıq səviyyəsinə malik işçilərlə komplektləşdirilməsi məqsədi ilə hər iki zavodun işçiləri işlədikləri vəzifə və peşələr üzrə İnsan Resursları Departamentində keçiriləcək test imtahanlarında iştirak edəcəklər. İmtahanlarda başqalarına nisbətən yüksək bal toplamış işçilər yeni strukturda yerləşdiriləcəklər.
Vurğulanmışdır ki, mövcud qanunvericiliyə əsasən əmək müqaviləsinə xitam verilməsi qadağan olunan işçilər test imtahanında iştirak etmədən qanunvericiliyin tələbləri gözlənilməklə yeni strukturda birbaşa yerləşdiriləcəklər.
SOCAR-ın Baş ofisinin İnsan Resursları Departamentinin peşəkarlıq səviyyəsi yoxlanılacaq işçilərlə görüşündə Heydər Əliyev adına BNEZ-nun, Həmkarlar İttifaqının, habelə “Neftçilərin hüquqlarını müdafiə təşkilatı” İctimai Birliyinin rəhbərləri və mətbuat nümayəndələri iştirak etmişlər.
İnsan Resursları Departamentinin rəisi Asif Bəkirli çıxış edərək struktur dəyişiklikləri zamanı əmək münasibətlərinin tənzimlənməsi prinsipləri, peşəkarlıq səviyyəsinin yoxlanılması məqsədi ilə test imtahanlarının keçirilmə qaydaları, imtahan suallarının mövzu tərkibi və onların yerləşdiriləcəyi portal, imtahandan sonrakı yerləşdirilmə qaydaları, Əmək qanunvericiliyinə əsasən imtahanda iştirak etmədən birbaşa yeni strukturda yerləşdiriləcək işçi kateqoriyaları haqqında ətraflı məlumat vermiş, vurğulamışdır ki, imtahanlar tam şəffaf, obyektiv və ədalətli şəraitdə keçiriləcəkdir.
Qeyd edilmişdir ki, peşəkarlıq səviyyəsinin yoxlanılması imtahanlarında nisbətən az bal toplayaraq sərbəstləşəcək işçilərə SOCAR-ın 17.01.2014-cü il tarixli əmri ilə təsdiq edilmiş “SOCAR üzrə sərbəstləşən işçilərin məşğulluğunun və sosial dayanıqlığının təmin olunmasına dair” Proqrama qoşulmaq üçün imkan yaradılacaqdır. Bir illik proqram çərçivəsində onların əmək haqlarının 50%-i və tibbi sığorta güzəştləri, eyni zamanda şirkətin digər strukturlarında ixtisas və iş təcrübələrinə uyğun vakansiya yaranarsa, işlə təmin olunmaq hüquqları saxlanılacaqdır.
Bildirilmişdir ki, Proqrama qoşulan işçilərin işlə təmin edilməsi şirkət üçün məcburi öhdəlik yaratmasa da, bu məsələ vakansiyaların idarə edilməsi zamanı İnsan Resursları Departamenti üçün prioritet olaraq qalır.
Heydər Əliyev adına Bakı neft emalı zavodunun direktoru Elman İsmayılov çıxış edərək, struktur dəyişiklikləri zamanı peşəkarlıq səviyyəsinin yoxlanılması prosesinin tələb olunan şəkildə təşkili üçün hər cür zəruri şəraitin yaradıldığını, zavodda işçiləri maraqlandıran sualları operativ cavablandırmaq üçün daimi komissiyanın fəaliyyət göstərdiyini bildirmişdir. Daha sonra məsələlər ətrafında fikir mübadiləsi aparılmışdır.
Qeyd edək ki, “Azərneftyağ” neft emalı zavodunda 2038 nəfər çalışır.
