Fevralın 17-də Tiranada Albaniya Respublikasının Hökuməti və Azərbaycan Respublikası Dövlət Neft Şirkətinin (SOCAR) sədrliyi ilə Albaniyanın qazlaşdırılması üzrə baş planının texniki-iqtisadi əsaslandırılmasına dair geniş toplantı keçirilmişdir.
2014-cü il dekabrın 19-da Azərbaycan və Albaniya arasında imzalanmış Anlaşma Memorandumuna uyğun olaraq keçirilən tədbirdə Avropa Komissiyasının, Enerji Cəmiyyəti Katibliyinin, Trans Adriatik Boru Kəməri (TAP) və BP şirkətlərinin, Qərbi Balkan İnvestisiya Çərçivəsi Təşkilatı (WBIF) və milli şirkətlərin yüksək səviyyəli nümayəndələri iştirak etmişlər.
Albaniyanın energetika və sənaye naziri Damian Qjiknuri Azərbaycanın Cənub Qaz Dəhlizinin inkişafında fəal rolunu və Albaniyanın qazlaşdırılması üzrə baş planının həyata keçirilməsində SOCAR-ın dəstəyini yüksək qiymətləndirmiş, layihənin ölkələr arasında əlaqələrin möhkəmləndirilməsinə, Albaniyada qaz şəbəkəsinin yaradılması ilə Balkan regionunda qaz şəbəkəsinin genişləndirilməsinə və bununla da Albaniyanın firavanlığına mühüm töfhə verəcəyini bildirmişdir.
SOCAR prezidentinin müşaviri Murad Heydərov Cənub Qaz Dəhlizi layihəsinin Cənub-Şərqi Avropada və Balkan yarımadasında həyata keçirilməsində Albaniyanın mühüm rol oynadığını qeyd etmiş, Azərbaycan Hökumətinin bu ölkənin qaz bazarının inkişafına öz töhfəsini vermək niyyətində olduğunu bildirmişdir. O, Azərbaycan və Albaniya hökumətlərinin alternativ qaz mənbələrini və Azərbaycandan Adriatik dənizi və Cənub-Şərqi Avropa istiqamətində nəqliyyat marşrutlarını təmin edən TAP və digər layihələr üzrə yaxından əməkdaşlıq etdiklərini vurğulamışdır.
Görüşün sonunda Albaniyanın qazlaşdırılması üzrə baş planının texniki-iqtisadi əsaslandırılmasının həyata keçirilməsi məqsədilə xüsusi işçi qrupun yaradılması barədə razılığa gəlinmişdir.
Növbəti görüş 2015-ci ilin aprel ayında keçiriləcəkdir.
