SOCAR-a (Azərbaycan Dövlət Neft Şirkəti) məxsus Kulevi neft terminalı 900-cü tankeri qəbul edib və yola salıb. Bu barədə Caspian Barrel limanın məlumatına istinadən bildirilir.
Terminal 2008-ci ilin may ayında istismara verilib. İstismara verildikdən 1 ay sonra terminalda ilk tanker yüklənərək yola salınıb. Fəaliyyətə başladıqdan sonra il yarım ərzində liman 40 min tona qədər tutumu olan tankerləri qəbul edib, 2009-cu ilin sonundan liman daha böyük, o cümlədən 115 ton tutumu olan AFRAMAX tipli müasir gəmiləri yükləməyə başladı”,- deyə məlumatda qeyd edilir.
Hazırda terminalın rəhbərliyi nəql edilən məhsulların çeşidlərinin genişləndirilməsi üzərində işləyir. Bundan başqa, limanın akvatoriyasının gecə vaxtlarında tankerləri qəbul etməyə və yola salmağa imkan verən əlavə naviqasiya vasitələri ilə təchiz edilməsi üzrə işlərin həyata keçirilməsi planlaşdırılır.
2012-ci ilin iyun ayında Kulevi neft terminalında maye karbohidrogen qazlarının qəbulu və yüklənməsi üzrə obyekt istismara verilib. Həmin ilin dekabr ayında terminaldan propilen yüklənmiş ilk tanker yola salınıb. 2014-cü ildə terminal metanolun yüklənib boşaldılması üzrə yeni nasos stansiyasını istismara verib. Ümumilikdə terminal istismara veriləndən 17,6 mln. ton yük daşınıb.
Xəbər verildiyi kimi, SOCAR tərəfindən Kulevi terminalının alınması haqqında müqavilə 2006-cı il dekabrın sonunda imzalanıb. SOCAR bu obyektin 100%-lik sahibidir.
Terminalın istismara verilmə mərasimi 2008-ci il mayın 16-da keçirilib. Terminalın ilkin gücü 10 mln. ton (3 mln. ton neft, 3 mln. ton dizel yanacağı və 4 mln. ton mazut) təşkil edir və gələcəkdə daha 20 mln. tondan artıq həcmədək artırılacaq.
