Dekabrın 30-da SOCAR-ın Baş ofisində 2014-cü ilin yekunları və 2015-ci ildə qarşıda duran vəzifələrə həsr olunmuş müşavirə keçirilib.
Caspian Barrel-ə SOCAR-dan verilən məlumata görə, Şirkətin idarə və müəssisə rəhbərlərinin də iştirak etdiyi müşavirəni Dövlət Neft Şirkətinin prezidenti Rövnəq Abdullayev açaraq yola saldığımız 2014-cü ilin dünya bazarında neftin qiymətinin ucuzlaşmasına baxmayaraq SOCAR üçün uğurlu keçdiyini bildirib.
O, 2014-cü ildə Azərbaycanın neft-qaz sənayesinin qazandığı nailiyyətlər, qlobal və regional əhəmiyyətli “Cənub Qaz Dəhlizi” çərçivəsində həyata keçirilən Cənubi Qafqaz qaz boru kəmərinin genişləndirilməsi, TransAnadolu (TANAP) qaz boru kəmərinin inşası və digər layihələrin gedişi haqqında ətraflı məlumat vermişdir. Abdullayev bildirmişdir ki, əsas göstəricilər üzrə proqnozlara tam əməl olunmuşdur.
Şirkətin birinci vitse-prezidenti, akademik Xoşbəxt Yusifzadə, vitse-prezidentləri Süleyman Qasımov və Mikayıl İsmayılov ilin əsas istehsalat göstəriciləri və 2015-ci ildə planlaşdırılan əsas istiqamətlər haqqında məruzə etmişlər. Qeyd olunmuşdur ki, neftin və qazın hasilatı, neft məhsullarının istehsalı ilə əlaqədar bütün proqnozlara, eləcə də Şirkətin ixrac öhdəliklərinə əməl olunmuşdur.
SOCAR-ın ümumi aktivlərinin həcmi 1 iyul 2014-cü il tarixinə 2005-ci ilin müvafiq dövrü ilə müqayisədə 5 dəfə artaraq, 24 milyard 442 milyon manata çatmışdır. SOCAR 2014-cü ildə öz tarixində ilk dəfə olaraq büdcəyə rekord səviyyədə 1 milyard 825 milyon manat həcmində ödəmələr (gəlir vergisi istisna olmaqla) etmişdir (ötən illə müqayisədə büdcə ödəmələri 15,9% artıb – Caspian Barrel).
Dövlət Neft Şirkətinin prezidenti Rövnəq Abdullayev müşavirəyə yekun vuraraq 2015-ci ildə qarşıda duran məsələlərdən danışmış, idarə rəhbərlərinə konkret göstərişlər vermişdir.
Bildirilmişdir ki, yeni ildə Şirkətin həyata keçirəcəyi neft-qaz əməliyyatlarının başlıca məqsədi Azərbaycan Respublikasının yanacaq-enerji balansına uyğun olaraq, neft məhsullarına və təbii qaza ölkədaxili tələbatın təmin olunmasından ibarətdir. Bu məqsədlə Şirkətin bütün idarə və müəssisələrində xərclərin optimallaşdırılmasına nail olunmalıdır.