2014-2015-ci tədris ilində Azərbaycan Respublikası Dövlət Neft Şirkətinin (ARDNŞ) təlim, tədris və sertifikatlaşdırma idarəsinin Qobustan Regional Təlim Mərkəzində 297 şagird təhsil alacaq.
SOCAR-in mətbuat xidmətinin yayadığı məlumatda bildirlir ki, yeni tədris ilinin başlanması münasibətilə keçirilən tədbirdə çıxış edən təlim, tədris və sertifikatlaşdırma idarəsinin rəisi Fuad Süleymanov mərkəzin fəaliyyətindən danışıb və yeni tədris ilinin başlaması münasibətilə müdavimləri təbrik edib.
Dövlət Neft Şirkətinin kadr, rejim və informasiya texnologiyaları üzrə vitse-prezidenti Xalik Məmmədov SOCAR rəhbərliyinin peşəkar milli kadrların hazırlanmasına daim diqqətlə yanaşdığını bildirib, bu istiqamətdə təlim, tədris və sertifikatlaşdırma idarəsinin rolunu vurğulayıb.
Şagirdlərin nəzəri-praktiki biliklərə uğurla yiyələnəcəklərinə əminliyini ifadə edən X.Məmmədov “BP-Azərbaycan” şirkətinin SOCAR ilə təlim sahəsində əməkdaşlığını diqqətə çatdırıb.
“BP-Azərbaycan” şirkətinin davamlı inkişaf təşəbbüsləri üzrə meneceri Qivami Rəhimli BP və onun tərəfdaşları tərəfindən təlim mərkəzinə 2014/2015-ci tədris ili üzrə 87 nəfər texnikin hazırlanması üzrə sifarişin verildiyini qeyd edib, Azərbaycanda reallaşdırılacaq neft-qaz layihələri üçün bu il hazırlanacaq mütəxəssislərə yüksək tələbin olacağını vurğulayıb.
Qobustan Regional Təlim Mərkəzinin müdiri Nəzakət Məmmədova bildirib ki, 2014-2015-ci tədris ilində mərkəzə 15 ixtisas üzrə qəbul olunmuş 297 şagirdin hazırlanması üçün lazımi maddi-texniki baza mövcuddur.
Tədbirdə çıxış edənlər mərkəzdə yaradılmış şəraitə görə SOCAR rəhbərliyinə minnətdarlıqlarını bildirib, texniki peşə təhsilinin sosial-iqtisadi inkişafa böyük təkan verdiyini qeyd ediblər. Sonda yüksək bal toplamış 20 nəfərə şagird vəsiqələri təqdim olunub.
