SOCAR (Azərbaycan Dövlət Neft Şirkəti) 2015-ci ildə Rusiyaya qaz ixracını bərpa edə bilər. Bu barədə bu gün jurnalistlərə müsahibəsində şirkətin prezidenti Rövnəq Abdullayev məlumat verib.
“Hazırda təmir işləri davam edir. Yəqin ki, Rusiyaya qaz tədarükü gələn il bərpa ediləcək”, – deyə R.Abdullayev bildirib.
Xəbər verildiyi kimi, SOCAR avqustda Bakı-Quba-Rusiya sərhədi magistral avtomobil yolunun qalan hissəsinin tikintisi və qaz nəqli infrastrukturunda texniki işlərlə əlaqədar olaraq Azərbaycan qazının Rusiyaya nəqlini dayandırıb.
Bundan başqa, 2014-cü ilin yanvar-may aylarında SOCAR avtomobil yolunun təmiri ilə əlaqədar Rusiyaya qaz ixracını dayandırmışdı.
Cari ilin birinci yarısında Rusiyaya 100 milyon kubmetr qaz ixrac olunmuşdu. Yay mövsümündə bir müddət qaz ixracı gündəlik 2 milyon kubmetr olaraq bərpa edilmişdi.
2013-cü ildə SOCAR Rusiyaya 1,37 milyard kubmetr qaz ixrac etmişdi.
