Bloomberg agentliyi məlumat verib ki, proqram təminatı sahəsində dünya nəhəngi Microsoft son 5 ayda neft qiymətlərinin aşağı düşməsindən $47 milyard itirmiş Exxon Mobil Corp. şirkətini kapitallaşma səviyyəsinə görə ötərək 2-ci yerə çıxıb.
Exxon şirkətinin səhmləri 13 noyabrda 0.8% aşağı düşərək şirkətin kapitallaşması $400,8 milyard təşkil edib. Microsoft şirkətinin səhmləri isə 1.7% artaraq şirkətin kapitallaşması $408,9 milyard olub. Apple şirkətinin səhmləri isə 2014-cü ildə 41% bahalaşıb.
Exxon ilk dəfə deyil ki, ikinci yeri yüksək texnologiyalı şirkətə verir: fevral və martda Google İnc. bir neçə günlüyə bu mövqeyi ələ keçirmişdi. Həmin günlərdə dünyanın ən məşhur axtarış mühərriki operatorunun dəyəri 410 milyard dollara çatmışdı.
