SOCAR “Neft Daşları” yatağındakı 1887 saylı özülü yenidən qurur

“Neft Daşları” yatağındakı 1887 saylı stasionar dəniz özülündə əlavə olaraq 4 istismar quyusunun qazılması məqsədi ilə yenidənqurma işlərinə başlanılmışdır.
Caspian Barrel-in SOCAR-ın mətbuat xidmətinə istinadən verdiyi xəbərə əsasən, özüldən qazılacaq 4 istismar quyusundan neftin hasilatını və nəqlini təşkil etmək məqsədi daşıyan layihə çərçivəsində indiyə kimi ümumi uzunluğu 120 metr olan müxtəlif diametrli 3 ədəd qoruyucu və 170 metr uzunluğunda 3 ədəd istiqamətləndirici boru quraşdırılmış, borulararası boşluq sement məhlulu ilə doldurulmuşdur.
120 metr uzunluğunda 1 ədəd qoruyucu borunun və 170 metr uzunluğunda 1 ədəd istiqamətləndirici borunun quraşdırılması nəzərdə tutulur. İşlərin bu ilin sonuna kimi başa çatdırılacağı gözlənilir.
Qeyd edək ki, tikinti-quraşdırma işləri “Neftqaztikinti” Trestinin 3 saylı Tikinti-Quraşdırma İdarəsi tərəfindən həyata keçirilir.
“Neft Daşları” yatağı 1949-cu ilin noyabrında kəşf edilmişdi.