SOCAR: Bolqarıstan 2019-cu ilin sonunadək Azərbaycan qazının qəbul nöqtəsini müəyyənləşdirməlidir

Bolqarıstan “Şahdəniz-2” layihəsi çərçivəsində Azərbaycan qazının qəbul nöqtəsini Trans-Adriatik qaz kəmərinin (TAP) tikintisi başa çatanadək müəyyənləşdirməlidir. Bunu şənbə günü jurnalistlərə Azərbaycan Respublikası Dövlət Neft Şirkətinin (SOCAR) prezidenti Rövnəq Abdullayev deyib.
Onun sözlərinə görə, “Bulgargaz” ötən ilin ilin sentyabrında “Şahdəniz-2” layihəsi çərçivəsində 1 milyard kubmetr qazın satın alınmasına dair kommersiya sazişi imzalayıb və 2019-cu ilin sonunadək Türkiyə və ya Yunanıstan sərhədində qazın qəbul nöqtəsini müəyyənləşdirməlidir.
Bolqarıstanın qazı əsas tədarüklərin başlamasınadək əldə etmək niyyəti ilə bağlı sualı cavablandıran Abdullayev deyib ki, bunun üçün texniki şərait olmalıdır və bu məsələyə baxılmalıdır.
Qeyd edək ki, SOCAR 2014-cü ilin sentyabrında Bakıda “Bulgargaz”la niyyət protokolu, “Bulgartransgaz” ilə isə anlaşma memorandumu imzalamışdı.
Azərbaycan qazının Avropa bazarına çatdırılması uzunluğu 3600 km olan “Cənub qaz dəhlizi” vasitəsilə həyata keçiriləcək. SOCAR rəhbərinin bu günkü bəyanatından aydın olur ki, Azərbaycan qazı Avropa bazarına 2020-ci ildə çatdırılacaq. Bir qədər əvvəl TAP boru kəmərinin kommersiya direktoru Luts Landver “Almaniyanın səsi” (DW) radiostansiyasına müsahibəsində də bunu söyləmişdi.