Qazprom başçısı Aleksey Miller Avropa İttifaqının (Aİ) Moskva ilə Kiyev arasında qaz sövdələşməsində borcun qaytarılması üçün qarşılıqlı ödənişdən istifadə etmək və Avropa şirkətlərindən birinin vasitəçilik etmək təklifini rədd edib.
Eyni zamanda o, “qış planı” üzrə Ukraynaya qaz satışına dair sazişin oktyabrın sonunadək imzalana biləcəyini bildirib.
“Ukraynaya qaz təhizatının maliyyələşdirilməsi mənbəyi müəyyən edilərsə, qış planı gələn həftə imzalana bilər”, Miller Rusiya televiziyasına deyib.
Ötən gün Brüsseldə keçirilmiş və Aİ energetika komissarı Günter Ettingerin də iştirak etdiyi qaz danışıqlarında Moskva və Kiyev payız-qış mövsümü üçün Ukraynaya Rusiyadan qaz təchizatına dair razılığa gələ bilməyiblər.
Danışıqların yekununda Ettinger oktyabrın 29-a təyin olunmuş növbəti görüşdə sövdələşmənin imzalana biləcəyinə ümidvar olduğunu bildirb.
Onun sözlərinə görə, Aİ hesab edir ki, Kiyevin Moskvaya qaza görə borcu, Rusiyanın Avropaya qazı Ukrayna ərazisindən ötürdüyünə görə ödəyəcəyi tranzit tarifləri hesabına qarşılıqlı sürətdə ödənilə bilərdi.
Lakin Qazprom başçısı Aİ komissarının Ukrayna ilə qaz haqq-hesabında Moskvaya qarşılıqlı ödəniş mexanizmindən istifadə etmək təklifini rədd edib.
Aleksey Millerin təbirincə, Aİ-nın təklif etdiyi variant Kiyevin Moskvaya borcunu Rusiyanın Ukraynaya tranzit tarifi qismində verəcəyi pul hesabına ödəmək deməkdir.
Miller bu təklifi Qazprom tərəfindən Ukraynanaya borcun ödənməsi üçün kreditin verilməsi kimi qiymətləndirib.
“BBC” radiosu
