SOCAR və BP milli kadrlarların inkişafı sahəsində 2 sənəd imzaladılar

Azərbaycan Dövlət Neft Şirkəti (SOCAR) və BP- Azerbaijan şirkəti milli kadrların inkişafı sahəsində əməkdaşlığın genişləndirilməsinə dair razılığa gəlib. Bu gün iki şirkət arasında müvafiq sənədlər imzalanıb.
SOCAR şirkətinin Qobustan Regional Tədris Mərkəzində yerli işçi qüvvəsinin tədrisi sahəsində əməkdaşlığa dair saziş və SOCAR ilə BP şirkətləri arasında razılaşdırılmış məşğulluq və təyinat proseslərinə dair Anlaşma Memorandumu imzalanıb.
Birinci saziş çərçivəsində BP şirkəti Səngəçal terminalı yaxınlığında yerləşən Səngəçal, Ümid, Əzimkənd və Qobustan qəsəbələrində yaşayan 100 nəfərin peşə və texniki təlimi üzrə öhdəlikləri öz üzərinə götürür. BP həmin vətəndaşların birillik təhsil xərclərini Azərbaycandakı layihələr üzrə tərəfdaşları ilə birgə təmin edəcək.
İkinci sənəd BP-nin operatorluğu altında Azərbaycanda reallaşdırılan məhsulun pay bölgüsünə dair bütün sazişləri əhatə edir və işçilərin məşğulluğu sahəsində əməkdaşlıq üzrə ümumi bazadan ibarətdir. Anlaşma Memorandumu elan edilmiş və yerli işçilər üçün nəzərdə tutulan vakansiyalar üzrə kənardan namizədlərin BP şirkəti tərəfindən işə qəbulu məsələsində SOCAR və BP arasında əməkdaşlıq üçün imkan yaradır.
İmzalanma mərasimində SOCAR-ın kadr, rejim və informasiya texnologiyaları üzrə vitse-prezidenti Xalik Məmmədovun bəyan edib kimi, bu sənədlər milli standartlara və tələblərə uyğun olaraq Azərbaycanın neft-qaz sənayesinə işçilərin hazırlanmasına ciddi töhfə verəcək.
Bu imzalanan sənədlər ona yol açır ki, artıq BP şirkəti xaricdən kadr dəvət edərkən hökmən SOCAR-ın kadr bazasından həmin ixtisas üzrə yerli mütəxəssislərin olub-olmaması ilə əlaqədar məlumat alacaq. Və yalnız müvafiq icazə alandan sonra həmin kadrı Azərbaycana dəvət edə biləcək. Əks təqdirdə Dövlət Miqrasiya Xidməti dəvət edilən xarici vətəndaşın Azərbaycanda əmək fəaliyyətinə başlamasına icazə verməyəcək və qanunvericilik tələblərinə uyğun olaraq ölkədən çıxarılmasını həyata keçirəcək. Bundan əlavə BP şirkəti, milliləşdirmə proqramına uyğun olaraq, dəvət etdiyi mütəxəssisin ixtisasına uyğun olaraq yerli kadrların da hazırlanmasını həyata keçirməli və bununla bağlı SOCAR-ı məlumatlandırmalıdır.
Qeyd edək ki, hazırda BP-də çalışan kadrların 76%-i yerli kadrlardır. 2018-ci ilə bu göstərici 90%-dən yuxarı olmalıdır.