İranın qaz sənayesi üzrə mühəndis şirkətinin direktoru Əli Rza Qəribi bildirib ki,Bağdaddakı elektrostansiyalara gündə 5 milyon kub metr qaz tədarük edəcək 97 km uzunluğu olan və 48 düyməlik boru kəmərinin inşası başa çatıb. Boru kəmərində sınaq işləri başa çatdıqdan sonra istismara veriləcək.
Adıçəkilən boru kəməri İlam vilayətinin Çarmale rayonundan başlayaraq İran-İraq sərhədində yerləşən Naftşehirdə bitir. Qəribi xatırladıb ki, müqaviləyə əsasən ilk üç ildə İraqa gündə 4-5 milyon kub metr İran qazı nəql ediləcək. Sonrakı iki il ərzində isə qaz tədarükünün həcmi gündə 15 milyon kub metrə, daha sonrakı 3 il ərzində isə 25 milyon kub metrə çatdırılacaq.
İraqa qaz tədarükünün artırılmasına hazırda inşa edilən Bisotun-Dehkalan və Bisotun-Naftşehr boru kəmərlərinin tikintisinin başa çatmasıda kömək edəcək. Bundan əlavə gələn il Ahvazda başlayıb Dehkalanda bitəcək 600 km uzunluğunda 6-cı magistral boru kəmərinin inşası başa çatacaq. Bu da İraq qaz tədarükünü artırmağa imkan verəcək.
