Avqustun 1-dən etibarən Avropa Birliyinin Rusiyaya qarşı sektoral sanksiyaları qüvvəyə mindi. Nəticədə Rusiyanın maliyyə sektoruna qarşı sanksiyalar sərtləşdirildi. Sanksiyalarla üzləşən banklardan biri də VTB idi, hansında ki, Rusiya hökumətinin payı 61% təşkil edir.
Ancaq bu bankın birbaşa Azərbaycanla ikitərəfli əlaqələri də var. Belə ki, VTB-nin həm Azərbaycanda filialı fəaliyyət göstərir, həm də Azərbaycan tərəfi onun səhmlərinə sahibdir.
Maliyyə məsələləri üzrə ekspert Samir Aliyev Caspian Barrel-ə da bildirib ki,
AB-nin Rusiyanın bank sektoruna tətbiq etdiyi sanksiyaların mənfi təzahürləri Azərbaycanda öz təsirini ilk növbədə Neft Fondunun timsalında hiss edəcək.
“Neft Fondu 2013-cü ilin mayında 500 milyon dollar investisiya müqabilində VTB bankın 2,95% səhmdarına çevrilmişdi. Baş verən hadisələr fonunda VTB bankının səhmlərinin ucuzlaşması və bununla da Neft Fondunun zərərə düşəcəyi istisna deyil”, – Əliyev belə qənaətdədir.
Daha sonra ekspert diqqəti ona yönəldir ki, digər zərbə Neft Fondunun aktivləri ilə bağlıdır. Belə ki, Fondun aktivlərində rus rublunun payı 1,3%-dir. Yəni 16,3 milyard rubl həcmində vəsait ehtiyatlara daxil edilib. Rubl isə son aylar kəskin ucuzlaşır. 2014-cü ildə valyuta rəsmi olaraq 9%-dən çox ucuzlaşıb. Sanksiyaların təsiri olaraq rublun ucuzlaşması davam edəcək. “Rusiylı maliyyə ekspertləri hesab edirlər ki, bir gədər sonra rublun dollara kursu hazırkı 35 vahiddən 38-dək yüksələcək, yəni rubl Amerika dollarına nisbətdə daha 9% uçuzlaşacaq. Deməli, faktiki olaraq Fondun 1 milyard dollar həcmində vəsaiti sanksiyaların təsiri nəticəsində dəyərini əhəmiyyətli dərəcədə itirmək təhlükəsi ilə üzləşib”, – deyə Əliyev bildirib.
Rusiyada investisiya mühitinin pisləşməsi güman ki, daşınmaz əmlak bazarına da zərbə vuracaq. Bu zərbə sözsüz ki, Fondun bir neçə il öncə Tverskaya, 16 ünvanında yerləşən və 133 milyon dollara aldığı biznes mərkəzindən də yan keçməyəcək.
Ancaq bununla belə Neft Fondunun mütəxəssisləri hesab edirlər ki, Avropa Birliyinin Rusiyaya qarşı tətbiq etdiyi sanksiyalar müvəqqəti xarakter daşıyır və hələlik konkret müddətə tətbiq edilib və bəllidir ki, regionda yaranmış siyasi hadisələrin tərəflər arasında həlli tapılmadığından irəli atılan addımlardan doğub. Onların fikrincə, bu proses heç zaman uzun davam edə bilməz və gec-tez tərəflər arasında nizamlanacaq, təbii ki, onda sanksiyalara da ehtiyac qala bilməz. Bu baxımdan Fondda hesab edirlər ki, hazırkı hadisələr VTB bankın fəaliyyətinə həqiqətən müəyyən zaman çərçivəsində neqativ təsir edə bilər. “Ancaq bizim rus rubluna və VTB banka, o cümlədən Rusiyada daşınmaz əmlaka etdiyimiz investisiyalar uzunmüddətli xarakter daşıdığından, ümumilikdə hesab etmirik ki, Avropa Birliyinin tətbiq etdiyi sanksiyaların təsirindən Neft Fondu ziyan görsün”, deyə Fonddan Caspian Barrel-in sorğusunu cavablandırıblar.
