İyunun 30-da SOCAR-ın Baş ofisində şirkətin idarə və müəssisələrinin kadrlar şöbəsinin rəhbərləri və aparıcı mütəxəssisləri üçün əmək müqaviləsi bildirişi üzrə elektron informasiya sistemindən istifadə qaydalarına həsr olunmuş seminar keçirilmişdir.
Seminarı giriş sözü ilə açan SOCAR-ın kadr, rejim və informasiya texnologiyaları üzrə vitse-prezidenti Xalik Məmmədov Azərbaycanda son illər əmək münasibətlərinin tənzimlənməsi istiqamətində görülən genişmiqyaslı işlərdən söz açmış, Azərbaycan Respublikası Prezidentinin “Azərbaycan Respublikasının Əmək Məcəlləsində dəyişikliklər edilməsi haqqında” 2013-cü il 27 dekabr tarixli Qanunun tətbiqi barədə” 3 fevral 2014-cü il tarixli Fərmanının əhəmiyyətindən bəhs etmişdir. Fərmana uyğun olaraq, əmək müqaviləsi bildirişi üzrə elektron informasiya sistemindən istifadə qaydalarının SOCAR-ın idarə və müəssisələrində tətbiq edilməsinin zəruriliyi vurğulanmış, Əmək və Əhalinin Sosial Müdafiəsi Nazirliyi ilə birlikdə yeni qaydaların tətbiqi istiqamətində keçirilən seminarın əhəmiyyəti diqqətə çatdırılmışdır.
Tədbirdə Əmək və Əhalinin Sosial Müdafiəsi Nazirliyinin əməkdaşları Fuad Heydərov, Əbülfət Məhərrəmov, Kənan Əkbərov, Aynurə Tağıyeva təqdimatlar keçirərək, əmək müqaviləsi bildirişinin elektron informasiya sisteminə daxil edilməsi qaydalarını, bildirişin qeydiyyata alınması ilə bağlı işəgötürənə göndərilən məlumat formasını əyani şəkildə nümayiş etdirmişlər.
Yeni yaradılmış elektron informasiya sisteminin ARDNŞ tərəfindən rəğbətlə qarşılanması yüksək qiymətləndirilmiş, bu sistemin qeyri-leqal əmək münasibətlərinin aradan qaldırılmasına zəmin yaradacağı bildirilmişdir.
Qeyd olunmuşdur ki, gücləndirilmiş imza sertifikatlarına malik işəgötürənlər əmək müqaviləsi bildirişlərini “Elektron hökumət” portalından (https://www.e-gov.az) istifadə etməklə Əmək və Əhalinin Sosial Müdafiəsi Nazirliyinin elektron informasiya sisteminə daxil edə bilərlər. Gücləndirilmiş elektron imza sertifikatlarının əldə olunması haqda seminar iştirakçılarına məlumat verilmişdir.
Daha sonra iştirakçıları maraqlandıran sualar ətrafında geniş fikir mübadiləsi aparılmışdır.
