İyunun 28-də SOCAR-nın “Azərikimya” İstehsalat Birliyinin kollektivi Azərbaycan Prezidenti yanında Gənclər Fondunun dəstəyi ilə həyata keçirilən “Gənc ekoloq” layihəsi çərçivəsində Sumqayıtda Xəzərin sahilində aparılmış təmizlik aksiyasında iştirak eedib.
“Sumqayıtı ekoloji təmiz şəhərə çevirək!” devizi altında keçirilən təmizlik aksiyasında Sumqayıt şəhər Gənclər və İdman Baş İdarəsi, Respublika Qızıl Aypara Cəmiyyətinin Sumqayıt şəhər bölməsi, eləcə də mətbuat nümayəndələri təmsil olunublar. Bu haqda SOCAR-ın mətbuat xidməti məlumat yayıb.
Tədbirdə Xəzərin Sumqayıta aid sahil zolağının xeyli hissəsi tullantılardan təmizlənmişdir. Aksiya iştirakçıları şəhər sakinlərinin diqqətini ekoloji problemlərə, Xəzərin müxtəlif tullantılarla çirklənməsi və bunun qarşısının alınması məsələlərinə yönəltmişlər. Toplanan tullantılar çeşidlənərək qablaşdırılmış və xüsusi nəqliyyat vasitələri ilə daşınaraq tullantılar poliqonuna təhvil verilmişdir.
Layihənin rəhbəri, “168 saat” qəzetinin baş redaktoru Vüsal Məmmədov növbəti ekoloji tədbirlər haqqında məlumat vermiş, dəstəyə görə “Azərikimya” İstehsalat Birliyinin kollektivinə və digər tərəfdaş təşkilatlara minnətdarlığını bildirmişdir.