Rumıniyanın paytaxtı Buxarestdə 12-ci Dünya Enerji Şurası Mərkəzi və Şərqi Avropa Regional Enerji Forumu – “Sabahın Enerjisi: Arzudan Reallığa” mövzusunda forum işinə başlamışdır.Foren-2014 Forumu Dünya Enerji Şurası Rumıniya Milli Komitəsinin təşkilatçılığı, Rumıniya hökümətinin himayəsi, Dünya Enerji Şurasının rəhbərliyi və Şuranın Mərkəzi və Şərqi Avropadakı üzv komitələrinin dəstəyi ilə keçirilir.
SOCAR Rumıniya Nümayəndəliyinin də iştirakçısı olduğu enerji forumuna Rumıniyanın dövlət və hökümət nümayəndələri, Avropanın beynəlxalq enerji şirkətlərinin rəhbərləri, enerji və ətraf mühit sahəsində ekspertlər və KİV nümayəndələri qatılmışdır.
Forum çərçivəsində keçirilmiş ”2014-cü ildə enerji bazarları: Şəffaflıq və bütövlük əsasında Avropaya inteqrasiya istiqamətində inkişaf və irəliləyiş” mövzusunda iclasda SOCAR Rumıniya Nümayəndəliyinin rəhbəri Həmzə Kərimov çıxış edərək SOCAR-ın fəaliyyəti və beynəlxalq arenada qazandığı uğurlar barədə iştirakçılara məlumat vermişdir.
Regionun enerji xəritəsini dəyişəcək TAP və TANAP layihələrinə də toxunan Həmzə Kərimov bildirmişdir ki, Azərbaycan qazının Avropa bazarlarına çatdırılması məqsədi daşıyan Transadriatik qaz kəmərinin (TAP) ötürücülük gücü 10 milyard kubmetr təşkil edəcəkdir. Kəmərin tikintisinə 2015-ci ildə başlanılacaq.
Bununla yanaşı yaxın gələcəkdə AGRİ layihəsi də diqqət mərkəzində olacaq. “Cənubi qaz dəhlizi”nin birləşdirici halqası kimi nəzərdə tutulan Trans-Anadolu qaz boru kəməri (TANAP) layihəsi barədə də məlumat verən H.Kərimov bildirmişdir ki, 2018-ci ildə istismara veriləcək boru kəməri ilkin mərhələdə ildə 16 milyard kubmetr qaz nəqli üçün nəzərdə tutulmuşdur. Çıxışda həmçinin SOCAR-ın Rumıniya bazarındakı fəaliyyətinə də toxunan Həmzə Kərimov vurğulamışdır ki, son illər şirkət Rumıniyaya 50 milyon avro sərmayə qoymuş, paytaxt Buxarest də daxil olmaqla ümumilikdə 28 YDM istifadəyə verilmiş, bununla da 400 yeni iş yeri açılmışdır.Çixişdan sonra jurnalistlərin sualları cavablandırılmışdır. Qeyd edək ki, iki ildən bir təşkil olunan və 1000-dən çox iştirakçının toplandığı FOREN-2014 Forumu Mərkəzi və Şərqi Avropada artıq ən mühüm multi-enerji hadisəsi kimi tanınmışdır. Foren-2014 iyunun 22-dən 26-dək davam edəcəkdir.