Bakı Ali Neft Məktəbinin rektoru Elmar Qasımov və Tədris, elm və beynəlxalq əlaqələr üzrə prorektor Ramiz Hümbətov “Total” şirkətinin dəvətilə Parisdə təşkil olunmuş “Total Enerji və Təhsil” beynəlxalq toplantısında iştirak etmişlər.
Dünyanın 50 ölkəsinin 80 neft-qaz təmayüllü qabaqcıl universitetinin rəhbər işçilərinin və professor-müəllim heyətinin iştirak etdiyi toplantı bir həftə davam etmişdir. Tədbirin birinci hissəsi dünya əhalisinin artması və sənaye sahələrinin inkişafı ilə bağlı enerji resurslarına olan tələbat və “Total” şirkətinin onları necə qarşıladığını nümayiş etdirən məruzələrin müzakirəsinə həsr olunmuşdur. Şirkət rəsmiləri müvafiq sahələrin inkişafı üzrə nəzərdə tutulan tədbirlərin təqdimatı keçirilmişdir.
Tədbirin ikinci hissəsi işəgötürmə və təhsil məsələlərinə həsr olunmuşdur. Bu məsələlərlə bağlı “Total”ın universitetlərlə əlaqələr şöbəsinin rəhbəri Monika Simon, təhsil üzrə baş korporativ menecer Lui Spozito və Total Professorlar Assosiasiyasının prezidenti Filip Persilon məruzə etmişlər. Toplantı iştirakçıları üçün “Total” şirkətinin Fransanın Pau şəhərindəki elmi-texniki mərkəzinə səfər təşkil edilmiş və orada şirkətin bir sıra ölkələrdə həyata keçirdiyi iri hasilat layihələri, qazmada çuxur nümunələrinin hərtərəfli tədqiqatı laboratoriyası və seysmik verilənlərin emalı və yatağın modelləşdirilməsi üçün “Pangea” yüksək-qabiliyyətli hesablama sistemi ilə tanışlıq baş tutmuşdur.
Tədbir çərçivəsində iştirakçılar 5 qrupa bölünmüş və onların arasında “Tələbələrin arzuları”, “Enerji sektorunun tələbələr üçün cəlbedici olması”, “Dünya təhsilində evolyusiya”, “Total” kimi şirkətlərin təhsilin inkişafına verəcəyi töhfələr”, “Rəqəmli inqilab”ın imkanlarından universitetlər necə bəhrələnməlidirlər?”, “İri şirkətin təhsil sahəsində müxtəlif ölkələrdə hansı məsuliyyətinin olması”, “Yaxın 10 ildə universitetləri nə gözləyir?” kimi mövzular ətrafında dəyirmi masalar təşkil olunmuşdur. Müzakirələr nəticəsində müvafiq tövsiyələr işlənib hazırlanmış və tədbir iştirakçılarının diqqətinə çatdırılmışdır.
