Bu gün İstanbulda “Şahdəniz-2” layihəsində Fransanın “Total” şirkətinin hissələrinin Türkiyənin “Türk petrolları” şirkətinə satılması, həmçinin bu ölkənin digər şirkəti BOTAŞ-ın TANAP layəsindəki iştirak payının artırılmasına həsr olunan tədbir keçirilib.
ANS TV-nin məlumatına görə, tədbirdə Türkiyənin Baş naziri Rəcəb Tayyib Ərdoğan və Azərbaycanın energetika naziri Natiq Əliyev və Dövlət Neft Şirkətinin prezidenti Rövnəq Abdullayev iştirak ediblər. İmzalanan sazişlərlə Türkiyənin “Şahdəniz” layihəsində iştirak payı artıb.
SOCAR prezidenti Rövnəq Abdullayevin sözlərinə görə, bu layihədə Azərbaycan qardaş ölkə olan Türkiyəyə üstünlük verməsi nəticəsində Türkiyənin “Şahdəniz” layihəsində iştirak payı artdı.
Türkiyənin Baş naziri Rəcəb Tayyib Ərdoğan TANAP-ın Avropa üçün çox mühüm bir layihə olduğunu bildirib: “Biz TANAP layihəsini sadəcə ticarət, sərmayə kimi dəyərləndirmirik. TANAP-ın Türkiyə və Azərbaycan arasında olduğu qədər, Avropa ölkələrilə də uzunmüddətli, güclü və sağlam münasibətlər yaradacaq bir layihə olacağına inanırıq”.