2014-cü ilin yanvar-mart aylarında Azərbaycan Dövlət Neft Şirkətinə (SOCAR) “Azəri-Çıraq-Günəşli” dəniz yataqlarından hasil olinmuş 600 milyon kubmetr səmt qazı verilib. Bu haqda “BP-Azerbaijan” şirkətinin I rübün yekunlarına dair hesabatında məlumat verilir.
Qeyd edək ki, ötən ilin müvafiq dövründə AÇG-dən SOCAR-a 500 milyon kub metr səmt qazı verilmişdi. Beləliklə, cari ilin I rübündə SOCAR-a AÇG-dən verilən səmt qazı həcmləri 20% artıb.
Xatırladaq ki, Hasilatın Pay Bölgüsü Sazişinə əsasən, müqavilə sahəsində hasil edilən səmt qazı Azərbaycan tərəfinə əvəzsiz olaraq verilir.
AÇG müqavilə sahəsindən Dərinsulu Günəşli platformasından hasil edilən səmt qazı 28 düym ölçülü sualtı qaz kəməri vasitəsilə birbaşa Səngəçal terminalına və oradan da bu ölkənin daxili istifadəsi üçün “Azəriqaz” dövlət qaz şəbəkəsinə göndərilir. Çıraq platformasından hasil edilən səmt qazı isə SOCAR-ın Neft Daşlarındakı kompressor stansiyasına verilir.
