2009-2013-cü illərdə SOCAR-ın (Azərbaycan Dövlət Neft Şirkəti) Ukraynada biznesin inkişafına investisiya qoyuluşları $160 mln.-u ötüb. Bu barədə “SOCAR Energy Ukraine” şirkətinin (SOCAR-ın törəmə strukturu) rəsmi saytında məlumat verilir.
“SOCAR-ın Ukraynada sosial və xeyriyyə təşəbbüslərinə qoyduğu vəsaitlərin həcmi $5 mln.-u ötüb”, – deyə məlumatda qeyd edilir.
Ukraynada qeyri-sabit siyasi və iqtisadi vəziyyətə baxmayaraq, SOCAR bu ölkədə biznesinin inkişafını davam etdirmək niyyətindədir.
“SOCAR-ın gələcək planlarında heç bir dəyişiklik yoxdur. Şirkət yeni yanacaqdoldurma məntəqələrinin tikintisini davam etdirəcək və yeni iş yerləri açacaq. Bu ilin payızına qədər şirkət özünün yanacaqdoldurma məntəqələrinin sayının 50% artırmağı planlaşdırır. Yaxın zamanlarda şirkət daha əvvəl Ukraynanın yanacaqdoldurma məntəqələri olmadığı bölgələrində yeni məntəqələr açacaq”, – deyə məlumatda vurğulanır.
“Bizim məqsədimiz Ukraynanın yanacaq bazarında şirkətin mövqelərini möhkəmləndirməkdir. Bu səbəbdən biz həm Ukraynanın paytaxtı, həm də onun regionlarında yanacaqdoldurma komplekslərimizi stabil inkişaf etdirməyə və əhalini keyfiyyətli Avropa neft məhsulları ilə təmin etməyə davam edirik”, – deyə məlumatda “SOCAR Energy Ukraine” şirkətinin baş direktoru Elçin Məmmədova istinadən bildirilir.
Xəbər verildiyi kimi, “SOCAR Energy Ukraine” 2008-ci ildə Ukraynada fəaliyyətə başlayıb. 2009-cu ilin əvvəllərində Ukraynanın pərakəndə yanacaq bazarı ətraflı tədqiq edildikdən sonra “SOCAR Energy Ukraine” ölkə ərazisində YDM şəbəkəsinin yaradılması və inkişafına dair qərar qəbul edib. 2014-cü ilədək Ukraynada “SOCAR” brendi altında 40-a yaxın YDM fəaliyyət göstərib.
