SOCAR-ın qrant layihələri hesabına fəaliyyət göstərən Azərbaycan Beynəlxalq Təhsil Mərkəzi İctimai Birliyi Azərbaycanda təhsilin inkişafına töhfələr verməkdə davam edir.
SOCAR-ın mətbuat xidmətinin yayadığı məlumata görə, Təhsil Mərkəzinə daxil olan Qafqaz Universitetinin tələbələri hər il beynəlxalq və respublika miqyaslı müsabiqələrdə yüksək nəticələr əldə edirlər. Bu günlərdə Universitetdə IT-Universe Beynəlxaq Proqramlaşdırma müsabiqəsinin yarımfinal mərhələsi (Azərbaycan birinciliyi) keçirilib.
Birincilikdə Qafqaz Universitetinin 10, Moskva Dövlət Universitetinin Bakı Filialının 2 tələbəsi iştirak etmişdir. Onlayn keçirilmiş müsabiqədə tələbələrə 4 saat ərzində 5 alqoritmik məsələnin həlli tapşırığı verilmiş, cavablar onlayn avtomatik sistemi vasitəsilə qiymətləndirilmişdir.
1 birinci, 3 ikinci və 2 üçüncü yerə Qafqaz Universitetinin tələbələri, 1 üçüncü yerə isə Moskva Dövlət Universitetinin Bakı Filialının tələbəsi layiq görülüb. Müsabiqənin nəticələrinə görə 7 tələbə (Qafqaz Universiteti-5, Moskva Dövlət Universitetinin Bakı Filialı-2) 6-9 iyun 2014-cü il tarixlərində Qazaxıstan Respublikasında keçiriləcək IT-Universe Beynəlxaq Proqramlaşdırma müsabiqəsinin final mərhələsinə vəsiqə qazanıblar.
Qeyd edək ki, müsabiqənin martda keçirilmiş 1/4 final mərhələsində Azərbaycanın 5 Universitetindən 48 tələbə (Qafqaz Universiteti-25, Azərbaycan Dövlət Neft Akademiyası-11, Moskva Dövlət Universitetinin Bakı Filialı-7, Azərbaycan Texniki Universiteti-4, Bakı Dövlət Universiteti-1 tələbə) iştirak etmiş və 13 tələbə yarımfinala vəsiqə qazanmışdır.