SOCAR-ın qazma sahəsi üzrə ixtisaslaşmış əsas struktur bölməsi olan “Kompleks Qazma İşləri” Trestində gənc mütəxəssislərin təcrübi biliklərinin artırılması diqqət mərkəzində saxlanılır.Trest Beynəlxalq Qazmaçılar Assosiasiyasının tələblərinə uyğun olaraq qazma işinin dünya standartlarına uyğun optimallaşdırılması, qazma vaxtı quyuya nəzarət, təzahürlərin idarə olunması üzrə kurslarda mütəxəssislərin istirakını təmin edir. Artıq 30 nəfər qazmaçı Şotlandiyanın Aberdin şəhərində müvafiq kurs keçərək sertifikatlara layiq görülüb.
Aprelin 14-dən başlayaraq 40 nəfərlik qrupda növbəti kursa start verilmişdir. Kursları Aberdin qazma məktəbinin mütəxəssisləri tədris edirlər. Qrupa trestin buruq ustaları, qazmaçı və qazmaçı köməkçiləri çəlb olunmublar.
Kursu müvəffəqiyyətlə bitirən qazmaçılar gələcəkdə SOCAR-ın həyata keçirdiyi layihələrdə yüksək səviyyədə xidmətlər göstərəcəklər. Belə kursların, treninqlərin təşkil edilməsində məqsəd qazmaçıların yeni texnika və texnologiyalardan istifadə vərdişlərinə yiyələnmələrini təmin etməkdir. Mayın 10-na kimi davam edəcək kursun sonunda iştirakçılar imtahan verəcək, imtahandan uğurla keçənlərə beynəlxalq IADC Well Control sertifikatlari təqdim olunacaqdır.
Gənc qazmaçıların beynəlxalq təcrübəyə yiyələnməsi və daha peşəkar kadr kimi formalaşması üçün gələcəkdə də bu kimi kursların davam etdirilməsi nəzərdə tutulur.
