logo

Norveç Mərkəzi Bankının rəhbəri neftin qiymətinin daha da artacağından ehtiyat edir

Views: 37

Norveç Mərkəzi Bankının rəhbəri neftin qiymətinin bir barrel üçün 100 dollar səviyyəsinə qayıdacağından ehtiyat edir.

Neftin qiymətinin bir barrel üçün 80 dollara qədər çatması Norveç iqtisadiyyatının xeyrinə olub. Bu, dövlət büdcəsində kəsiri azaltmağa və iqtisadi fəaliyyəti gücləndirməyə kömək edib. Üstəlik, bu ay neftin qiyməti son yeddi ildə ilk dəfə Norveç kronunun məzənnəsinin artmasına səbəb olub. Lakin ölkənin Mərkəzi Bankının rəhbəri Oysteyn Olsen xəbərdarlıq edir ki, neftin qiymətinin hədsiz artması neft sənayesində yenidən lüzumsuz eyforiyaya səbəb ola bilər.

AZƏRTAC xəbər verir ki, Oysteyn Olsen “Blumberq” nəşrinə müsahibəsində deyib: “Neftin qiyməti hədsiz artarsa, biz bu sahədə xərclər barədə məlumatın çox cüzi olduğu vəziyyətə qayıda bilərik. Zaman keçdikcə volatilliyin azalması Norveçin neft sektorunun xeyrinə olacaq”.

2014-cü ildə neftin qiymətinin azalması nəticəsində Norveç çox ziyana düşmüşdü. Qısa müddətdə işsizlərin sayı artmış, dövlət xəzinəsinin gəlirləri azalmışdı. O vaxt kütləvi fiskal və monetar stimullar tətbiq olunması ölkə iqtisadiyyatını birbaşa resessiyadan xilas etdi, Mərkəzi Bank isə faiz dərəcələrini rekord minimuma endirdi. Bundan əlavə, həmin dövrdə krallığın hökuməti ilk dəfə olaraq Norveç Dövlət Pensiya Fondunun (Neft Fondu) aktivlərindəki 1 trilyon dollar vəsaitdən istifadə etdi.

İndi neftin qiymətinin yenidən artması ilə əlaqədar Norveç Dövlət Pensiya Fondunun mədaxili artır, işsizlik göstəricisi 4 faizdən aşağıdır, inflyasiya isə yenidən hökumətin nəzərdə tutduğu səviyyəyə yaxınlaşır. Lakin Mərkəzi Bank neft sektorunda xərclərin artdığı dövrə qayıtmaqda o qədər də maraqlı deyil. Bu, kronun məzənnəsini nəzarətdə saxlamaq strategiyasına mane olardı, çünki Norveç Mərkəzi Bankı pul-kredit siyasətinin sərtləşdirilməsi planını həyata keçirir.

 

Comments: 0

Your email address will not be published. Required fields are marked with *

0

Your Cart