Azərbaycan, Materiallar

Neft Fondu Yaponiyanın logistika sahəsinə $100 mln yatırım edib

Azərbaycan Respublikası Dövlət Neft Fondu (ARDNF) daşınmaz əmlaka hazırki investisiya çərçivəsində Asiya və Sakit Okean Hövzəsi regionunda logistika sahəsində ixtisaslaşmış “E-Shang Redwood” şirkəti tərəfindən idarə olunan “Redwood Japan Logistics Fund II” (RJLF II) Fonduna (kapitalın ümumi həcmi 1 milyard ABŞ dollarıdır) 100 milyon ABŞ dolları məbləğində investisiya yatırıb.

Neft Fondunun ictimaiyyət üçün açıqladığı məlumatda bildirilir ki, adıçəkilən fondda ARDNF ilə yanaşı dünyanın bir sıra qabaqcıl institusional investorları da iştirak edir.

İnvestisiyanın illik hədəf gəlirliliyi 15% olmaqla müddəti 5-7 il təşkil edəcəkdir.

“RJLF II” fondunun investisiya strategiyasının əsasını Yaponiyanın Tokio, Osaka və Naqoya kimi şəhərlərinin yeni daşınmaz əmlak təkliflərinin məhdud olduğu, eləcə də nəqliyyat infrastrukturu üçün ən uyğun ərazilərində müasir logistika mərkəzləri inşa edərək, uzunmüddətli müqavilələr əsasında onların icarəsini təmin etmək, daha sonra isə həmin mərkəzləri əsasən institusional investorlara satmaqla yatırımlardan çıxmaq təşkil edir.

“E-Shang Redwood” şirkəti hal-hazırda Çin Xalq Respublikası, Yaponiya, Cənubi Koreya və Avstraliya kimi ölkələrdə müxtəlif layihələr həyata keçirməkdədir.

Ötən il Yaponiya daşınmaz əmlak bazarında müasir logistika mərkəzləri ölkə üzrə ümumi logistika obyektlərinin cəmi 6%-ni təşkil etmişdir və hal-hazırda da bu mərkəzlər üzrə icarəyə verilməmiş sahənin ümumi həcmi cəmi 6,8% səviyyəsindədir. Son 5 il ərzində e-ticarət şirkətləri tərəfindən müasir logistika mərkəzlərinə olan tələb isə öz növbəsində illik olaraq 9% artmışdır ki, gələcəkdə də bu tendensiyanın davamı proqnozlaşdırılır.