Macarıstan və Azərbaycan arasında təbii qazın tədarükü haqqında imzalanmış saziş iki il müddətinə nəzərdə tutulub.
Bu barədə Macarıstanın xarici işlər naziri Peter Siyarto sosial şəbəkədə yazıb.
“Təbii qazın alınması ilə bağlı növbəti saziş: bu dəfə Azərbaycanla, iki il müddətinə və 800 milyon kubmetr həcmində olacaq”, – o bildirib.
Onun sözlərinə görə, Macarıstan və Azərbaycan arasında əməkdaşlıq Budapeştin enerji təhlükəsizliyi risklərini azaldır və təchizatın uzunmüddətli diversifikasiyasını gücləndirir.
Xatırladaq ki, dekabrın 10-da Azərbaycan Dövlət Neft Şirkəti (SOCAR) ilə Macarıstanın “MVM ONEnergy” şirkəti arasında təbii qaz təchizatına dair yeni saziş imzalanıb.
Azərbaycan Dövlət Neft Şirkəti (SOCAR) ilə Macarıstanın “MVM ONEnergy” arasında təbii qaz təchizatına dair yeni saziş imzalanıb.
10 dekabr 2025-ci il tarixdə Bakıda SOCAR prezidenti Rövşən Nəcəfin “MVM Group”un baş icraçı direktoru Karoly Matrai ilə görüşündə Azərbaycan qazının Macarıstana tədarükünə dair saziş imzalanıb.
SOCAR-ın yaydığı məlumata görə, 1 yanvar 2026-cı ildən qüvvəyə minəcək saziş Azərbaycan ilə Macarıstan arasında strateji enerji tərəfdaşlığının daha da möhkəmləndirilməsinə xidmət edir.
Həmçinin SOCAR bildirb ki, təbii qaz təchizatına dair yeni saziş şirkətlər arasında əvvəlki müqavilə əsasında hazırlanıb. Son illər ərzində hər iki şirkət uğurlu, etibarlı və qarşılıqlı faydalı əməkdaşlıq münasibətlərini davam etdiriblər. Tərəfdaşlığın uzadılması hər iki tərəfin uzunmüddətli enerji əməkdaşlığına və regional enerji təhlükəsizliyinə sadiqliyini əks etdirir.
Xatırladaq ki, SOCAR və “MVM CEEnergy” 2023-cü ilin iyun ayında 100 milyon kubmetr qazın tədarükü haqqında müqavilə imzalayıb. Tədarükə 2024-cü ilin aprel ayında başlanılıb.
Bundan başqa, “MVM Group” “Şahdəniz” layihəsində 5 %, “South Caucasus Pipeline Company”də (SCPC, Cənubi Qafqaz Boru Kəməri Magistralının operatoru) 4 % paya malikdir.
