Azərbaycan Dövlət Neft Şirkəti (SOCAR) bu gün 2024-cü il üçün audit olunmuş maliyyə hesabatını açıqlayıb.
Caspian Barrel şirkətin hesabatına istinadən xəbər verir ki, ötən il SOCAR -ın konsolidə edilmiş gəlirləri $49 817 mln təşkil edib. 2023-cü illə müqayisədə cəmi gəlirləri $301,2 mln azalıb.
Hesabata əsasən, SOCAR-ın xalis mənfəəti ötən il $1 721,8 mln təşkil edib (2023-cü illə müqayisədə $502,3 mln artıb).
SOCAR-ın gəlirlərinin ən çox çox azalması İsveçrədə (SOCAR Trading-in fəaliyyətinə aiddir) qeydə alınıb. Gəlirlərin azalması Azərbaycanda və Gürcüstanda da (cüzi) özünü göstərib. Amma BƏƏ-də, Türkiyədə və sair ölkələrdə SOCAR-ın biznesi artıma doğru irəliləyib.
SOCAR-ın ümumi gəlirlərinin 90,37%-i Azərbaycandan kənarda həyata keçirilən əməliyyatlardan əldə edilib.
SOCAR-ın gəlirlərinin 73%-i ($36,33 mlrd) satış və ticarət əməliyyatlarının payına düşüb (bunun da $31,7 mlrd-ı əsasən SOCAR Trading-in dəaliyyətinə aiddir).
Gəlirlərin 35,3%-i və ya $17,57 mlrd-ı emalı və neft-kimya seqmenti biznesindən əldə edilib (burada əsas gəlir SOCAR-ın Türkiyədəki STAR neft emalı zavodunun və Petkim neft-kinya zavodunun payına düşüb).
SOCAR-ın gəlirlərində hasilat seqmentinin payı 10,2% ($5,1 mlrd) təşkil edib. Şirkətin qaz biznesi ona ötən il $3,83 mlrd gəlir gətirib.
Nəhayət xidmət sektoru SOCAR-a $800,6 mln, digər sahələr isə $650 mın gəlir gətirib.
