Macarıstanın MVM və MOL şirkətləri uzunmüddətli saziş imzaladıqdan sonra Azərbaycan neftinin ilk birgə tədarükünü həyata keçirib. Bu barədə MOL-un mətbuat xidməti məlumat yayıb.
“Dugi Otok” neft tankeri Ceyhan ixrac terminalından (Türkiyənin cənub-şərqi) Omisalj terminalına (Krk adası, Şimali Xorvatiya) 92 min ton (687 min barel) Azeri Light markalı xam neft çatdırıb.
Gəmi izləmə məlumatlarına görə, neftin boşaldılması 14 iyun 2025-ci il tarixində həyata keçirilib.
Xatırladırıq ki, Ceyhan Azərbaycandan neft ixrac edən Bakı-Tbilisi-Ceyhan (BTC) magistral neft kəmərinin son nöqtəsidir, Omisalj isə Xorvatiyadan Macarıstana gedən Adriatik magistral neft kəmərinin başlanğıc nöqtəsidir.
MOL BTC magistral neft kəmərində 8,9% paya malikdir.
MOL işlənmə layihəsindəki 9,7% payı ilə Azərbaycanın şelfində yerləşən Azəri-Çıraq-Günəşli (AÇG) yataqlar blokundan xam neft idxal edir.
2024-cü ildə şirkət AÇG-dən Mərkəzi və Cənub-Şərqi Avropadakı bazarlarına təxminən 5 milyon barel xam neft göndərib ki, bu da ayda təxminən bir tanker daşınmasına bərabərdir.
Macarıstanın MVM Group şirkəti Azərbaycanın neft-qaz sektoruna 2024-cü ildə daxil olub.
Şirkət Azərbaycanın Cenub Qaz Dehlizi (CQD) şirkətindən aldığı Şahdəniz layihəsində 5% və Azerbaijan Gas Supply Company Limited (AGSC) şirkətindən aldığı Cənubi Qafqaz Boru Kəməri Şirkətində (SCPC, Cənubi Qafqaz Boru Kəmərinin operatoru) 4% paya malikdir.
MOL və MVM-nin 2025-ci ilin mayında imzaladığı saziş neft və qaz kondensatının Xəzər regionundan BTC boru kəməri ilə Türkiyənin Ceyhan terminalına birgə tədarükünü, buradan xam ehtiyatın MOL bazarlarına göndərilməsini nəzərdə tutur.
Bu əməkdaşlıq çərçivəsində MOL-un öz NEZ-lərində alternativ mənbələrdən emal olunan neftin həcmini ildə 160 min tona çatdıra biləcəyi də gözlənilir.
Xəbərlərə görə, Xəzər regionu ilə Mərkəzi Avropa arasında müntəzəm və proqnozlaşdırıla bilən təchizat zəncirinin yaradılması məqsədi ilə növbəti aylarda daha çox daşınma gözlənilir.
