“Abşeron” yatağının işlənməsinin ikinci fazası üçün Front End Engineering Design (ilkin layihələndirmə – FEED) mərhələsi başlayıb.
Bu barədə Trend-ə Fransanın enerji nəhəngi “TotalEnergies”in (layihənin səhmdarıdır) Bakı ofisindən məlumat verilib.
“Yataqların işlənilməsinin ikinci fazası üçün FEED mərhələsi il ərzində yekun investisiya qərarının (FID) qəbul olunmasına hazır olmaq məqsədilə 2025-ci ilin əvvəlindən başlanıb”, – deyə şirkətdən bildirilib.
“TotalEnergies” vurğulayıb ki, hazırda 2023-cü ilin iyul ayından etibarən fəaliyyət göstərən və illik 1,5 milyard kubmetr qaz və günlük 12 min barel kondensatın hasilatını təmin edən “Abşeron” yatağının ilkin işlənilməsi mərhələsi çərçivəsində hasilatın sabit və təhlükəsiz səviyyədə aparılması təmin olunur.
Qeyd edək ki, “Abşeron” yatağı Xəzər dənizinin Azərbaycan sektorunda, Bakıdan 100 kilometr cənub-şərqdə və “Şahdəniz” yatağından 25 kilometr şimal-şərqdə yerləşir.
“Abşeron”da qaz və kondensat hasilatı 2023-cü ilin 10 iyul tarixindən etibarən JOCAP əməliyyatçı şirkəti tərəfindən həyata keçirilir.
Tərəfdaşlarla olan razılaşma əsasında, SOCAR yataqdan hasil olan qazı tam həcmdə daxili bazarın ehtiyaclarının ödənilməsi üçün alır, kondensat isə Bakı-Tbilisi-Ceyhan neft kəməri ilə xaric bazarlara çıxarılır.
