Britaniya şirkəti “BP Plc” bu ilin sonunda “Azəri-Çıraq-Günəşli” (AÇG) yataqlar blokunun “Dərin qaz” (“deep-gas”) laylarından ilk qaz hasilatına başlamağı planlaşdırır.
Bu barədə “Report”un sualını cavablandırarkən “BP-Azerbaijan” şirkətinin mətbuat xidmətinin rəhbəri Tamam Bayatlı jurnalistlərə bildirib.
“Ötən il “Qərbi Çıraq” platformasından başlanan ilk istismar quyusunun qazılması hələ də davam edir. Qazma işləri bu ilin ikinci-üçüncü rübündə başa çata bilər. Lakin işlər başa çatdıqdan sonra belə quyu dərhal istismara verilməyəcək, çünki quyunun bu qazın sahilə çatdırılacağı mövcud infrastruktura qoşulması üçün işlər görülməlidir. Bunun üçün platformada çoxlu avadanlıq quraşdırılmalıdır və bu vaxt aparacaq. Ona görə də “deep-gas” çərçivəsində ilk qaz 2025-ci ilin sonuna gözləmək olar”, – T.Bayatlı bildirib.
Qeyd edək ki, “Azəri-Çıraq-Günəşli” Azərbaycanın ən böyük neft yatağı blokudur. Yataqlar blokunun işlənməsi üzrə hasilat bölgüsünə dair ilk müqavilə 1994-cü ilin 20 sentyabr tarixində imzalanıb. 2017-ci ilin 14 sentyabr tarixində isə həmin yataqların birgə istismarına və hasilatın pay bölgüsünə dair yeni saziş imzalanıb.
Bu sazişə ikinci əlavəni 2024-cü il sentyabrın 20-də Bakıda imzalayıblar. Bu da blokun dərin yataqlarından qaz hasilatını nəzərdə tutur. Yeni sənəd HPBS (Hasilatın pay bölgüsü sazişi) kimi 2049-cu ilə qədər qüvvədə olacaq.
