SOCAR-ın prezidenti Rövşən Nəcəf dekabrın 5-də “Yokogawa Europe B.V.”nin prezidenti və “Yokogawa Electric Corporation”ın vitse-prezidenti Seita Hagihara ilə görüşüb.
SOCAR-ın mətbuat xidmətinin məlumatına görə, Görüş çərçivəsində SOCAR ilə “Yokogawa Electric” şirkəti arasında əməkdaşlığa dair Anlaşma Memorandumu imzalanıb. Memorandum şirkətlər arasında mövcud əməkdaşlığın genişləndirilməsini nəzərdə tutur.
Sənədə əsasən, tərəflər istehsalın optimallaşdırılması, enerji səmərəliliyinin artırılması, dekarbonizasiya fəaliyyəti, emissiyaların azaldılması, habelə rəqəmsallaşdırma və digər istiqamətlərdə əməkdaşlıq edəcək, birgə layihələrin icrası imkanlarını araşdıracaqlar.
Caspian Barrel öz növbəsində qeyd edir ki, “Yokogawa Electric Corporation” ölçmə texnologiyası və sənaye avtomatlaşdırılması sahəsində ixtisaslaşmış mühəndislik şirkətidir. Şirkət 1915-ci ildə Tamisuke Yokoqava tərəfindən Şibuyada (Yaponiya) elektrik sayğacları üzrə tədqiqat institutu kimi yaradılmışdır. Yaponiyada elektrik sayğaclarının inkişafı və istehsalına öncülük etdikdən sonra şirkət 1920-ci ildə “Yokogawa Electric Works Ltd” adı ilə qeydiyyatdan keçib. Şirkət hazırda dünyanın 50 ölkəsində fəaliyyət göstərir və işçilərinin ümumi sayı təxminən 19 500 nəfərdir.
