2022-ci ildə Azərbaycan üçün bir barel neftin fiskal “ziyansız” qiyməti (fiscal breakeven oil price) 41,6 dollar, 2023-cü ildə 51,8 dollar təşkil edəcək.
“İnterfaks-Azərbaycan” agentliyi məlumat verir ki, bu barədə Beynəlxalq Valyuta Fondunun (BVF) Qafqaz və Mərkəzi Asiya ölkələri üzrə aprel ayı üçün regional icmalında qeyd olunub.
2021-ci ildə bu göstərici bir barel üçün 56,9 dollara bərabər olub.
“Ziyansız qiymət” – dövlətin maliyyə xərcləri və mənfəətinin müqayisəli qiymət ölçşüsüdür.
Bundan başqa, BVF-nin proqnozlarına əsasən, 2022-ci ildə Azərbaycan üçün xarici ticari “ziyansız” qiyməti (external breakeven oil price) 103,3 dollar və 2023-cü ildə – bir barel üçün 78,6 dollar təşkil edəcək (2021-ci ildə bir barel üçün 69,5 dollar olub).
BVF-nin qiymətləndirmələrinə görə, 2022-2023-cü illərdə Azərbaycanda gündəlik neft hasilatı 0,69 milyon barel təşkil edəcək, bu da 2021-ci ilin göstəricisinə uyğundur.
2022-ci ildə ölkədə qaz hasilatı gündəlik 0,81 milyon barel neft ekvivalentində, 2023-cü ildə – gündəlik 0,86 milyon barel təşkil edəcək (2021-ci ildə – gündəlik 0,79 milyon barel neft ekvivalentində olub).
BVF-nin proqnozlarına əsasən, 2022-2023-cü illərdə Azərbaycandan neft ixarcı illik 0,56 milyon barel (2021-ci ilin göstəricisinə uyğundur), 2022-ci ildə qaz ixracı – 0,45 barel neft ekvivalenti (2021-ci ildə – 0,43 milyon barel), 2023-cü ildə – 0,49 milyon barel təşkil edəcək.
2022-ci il Azərbaycanın dövlət büdcəsində neftin bir barelinin qiyməti 50 dollar səviyəsində hesablanıb.
