Bu gün “Azəriqaz” İstehsalat Birliyinin baş direktoru Ruslan Əliyev Balakən rayonu, baş direktorun satış və istismar üzrə müavini Cahid Hüseynov Zaqatala rayonu, baş direktorun əsaslı tikinti üzrə müavini Ramil İskəndərov isə Şəki şəhəri sakinləri ilə birbaşa videobağlantı yaratmaqla onlayn vətəndaş qəbulu keçiriblər
Bu barədə “Report”a Azərbaycan Dövlət Neft Şirkətinin (SOCAR) “Azəriqaz” İstehsalat Birliyindən məlumat verilib.
Bildirilir ki, müraciətlər zamanı Vətən müharibəsinin iştirakçısı olan bir neçə qazi ailəsi təbii qaz çəkilişinə dair müraciət edib.
Bundan başqa, qaz xətlərinin yerinin dəyişdirilməsi, fərdi qaz çəkilişlərinə dair müraciətlər də ünvanlanıb. Baş direktor R.Əliyev qaldırılan məsələlərin həlli, xüsusilə də qazi və şəhid ailələrinin müraciətlərinə həssaslıqla yanaşılması ilə bağlı müvafiq tapşırıqlarını verib.
Onu da qeyd edək ki, bu gün baş direktor R. Əliyev Birliyin “Facebook” sosial şəbəkəsi üzərindən canlı yayım da təşkil edib. O, abonentləri maraqlandıran sualları cavablandırıb. Təxminən 40 dəqiqə ərzində 1 000-dən çox müraciət daxil olub. Bunların arasında smart-kart tipli sayğacların mexaniki elektron sayğaclarla əvəzlənməsi, qazlaşdırılmasına ehtiyac duyulan yeni massivlər, təbii qazdan aşağı tariflə istifadəyə dair və s. suallar yer alıb. “Azəriqaz” İB-nin baş direktoru belə görüşlərin mütəmadi olacağını, cavablandırılmasına vaxt çatmayan bütün müraciətlərin isə araşdırılacağını deyib.
