“Cənub Qaz Dəhlizi” Məşvərət Şurasının 3-cü iclası 2017-ci ilin fevral ayında keçiriləcək. Bu barədə energetika naziri Natiq Əliyev noyabrın 8-də Bakıda İtaliyanın xarici işlər və beynəlxalq əməkdaşlıq naziri Paolo Centiloni ilə görüşdə bildirib.
“Cənub Qaz Dəhlizi” Məşvərət Şurasının gələn ilin fevral ayında keçiriləcək növbəti iclası layihənin vaxtında yekunlaşması üçün tərəflərin səylərinin koordinasiyasına fayda verəcək”, – deyə N.Əliyev qeyd edib.
O, İtaliyanın əvvəlki iclaslarda iştirakını yüksək qiymətləndirib.
Nazir Transadriatik qaz boru kəməri (TAP) layihəsini İtaliya ilə enerji əməkdaşlığının proriteti kimi səciyyələndirərək, layihənin reallaşdırılması ilə bağlı ortaya çıxan çətinliklərin hökumətlərin dəstəyi ilə yoluna qoyulduğunu və vəziyyətin daim nəzarətdə saxlandığını diqqətə çatdırıb.
İtaliyalı nazir Paolo Centiloni ölkəsinin TAP- la bağlı mühüm öhdəlik götürdüyünü deyərək, Azərbaycan təbii qazının 2020-ci ildə Avropa bazarlarına çatdırılması üçün hökumət səviyyəsində dəstək veriləcəyini vəd edib.
